Навукоўцы знайшлі спосаб «перазагрузіць» вока і аднавіць парушаны зрок
Амерыканскія даследчыкі сцвярджаюць, што знайшлі спосаб аднавіць зрок людзям з распаўсюджаным парушэннем развіцця вачэй, вядомым як «лянівае вока». Яны прапануюць літаральна «перазагрузіць» сятчатку, што дазволіць зрокавай сістэме развіцца і вылечыцца самастойна.
Амбліяпія, або «лянівае вока», — гэта стан, пры якім зрок у адным ці абодвух вачах не развіваецца належным чынам, з прычыны таго, што мозг з нейкіх прычын вучыцца ігнараваць сігналы ад слабейшага вока. Традыцыйныя метады лячэння (напрыклад, нашэнне павязкі на здаровым воку) звычайна эфектыўныя толькі ў раннім узросце, пакуль актыўна фармуюцца нервовыя сувязі. Дарослым жа дапамагчы значна складаней, бо мяркуецца, што іх зрокавая сістэма ўжо сфармаваная і страціла пластычнасць.
Аднак новае адкрыццё можа ўсё змяніць. Пра інавацыйную тэхналогію расказвае выданне The Independent спасылаючыся на даследаванне навукоўцаў з Масачусецкага тэхналагічнага інстытута.
Каманда навукоўцаў выявіла, што часовая анестэзія сятчаткі «лянівага вока» здольная аднавіць зрокавую рэакцыю мозгу на гэта вока нават у дарослым узросце. Эксперыменты праводзіліся на мышах: ім уводзілі анестэтык у амбліяпічнае вока, фактычна адключаючы сятчатку на два дні.
Як расказалі аўтары даследавання ў сваім артыкуле, апублікаваным у навуковым часопісе Cell Reports, яны сфакусаваліся на працы латэральнага каленчатага ядра — сеткі нерваў, якая перадае інфармацыю ад вачэй да зрокавай кары галаўнога мозга.
Яшчэ ў 2008 годзе было заўважана, што блакаванне сігналаў ад сятчаткі вока да нерваў у гэтай сетцы прымушала нейроны пасылаць сінхронныя «ўсплёскі» электрычных сігналаў да нерваў у зрокавай кары. Новае даследаванне павінна было праверыць, ці сапраўды гэтыя ўсплёскі могуць адыграць ролю ў лячэнні.
Каб высветліць гэта, навукоўцы ўвялі анестэзію ў вочы мышэй з амбліяпіяй і параўналі іх з кантрольнай групай. Яны выявілі, што ін'екцыя фактычна адключыла сятчатку на два дні.
Затым даследчыкі вымералі актыўнасць нейронаў у зрокавай кары, каб вызначыць прапорцыю сігналаў ад кожнага вока. Высветлілася, што ў мышэй, якія атрымалі лячэнне, гэты паказчык быў значна вышэйшы ў параўнанні з тымі, каго пакінулі без тэрапіі. Гэта сведчыць пра тое, што пасля аднаўлення працы сятчаткі ўклад «лянівага вока» вырас да парытэту са здаровым — фактычна адбылася паспяховая «перазагрузка».
Навукоўцы выказваюць асцярожны аптымізм і спадзяюцца ў будучых даследаваннях пацвердзіць эфектыўнасць методыкі на іншых відах жывёл, а ў выніку — укараніць яе для лячэння людзей.
Са слоў аўтараў, калі тэрапія пакажа сваю эфектыўнасць на людзях, гэта стане значным прарывам. Пацыентам больш не давядзецца цярпець нязручнасці і закрываць здаровае вока, як таго патрабуюць цяперашнія метады. Замест гэтага прапануецца часова інактываваць само «лянівае вока». Пасля такой паўзы яно здолее «перазагрузіцца» і вярнуцца да паўнавартаснага функцыянавання.
Герой Беларусі Марына Васілеўская нарадзіла дачку ад касманаўта Алега Навіцкага16
Каментары