Жонка адгаворвала падпалкоўніка ДФР браць хабары, а той казаў: «Атрымаю палкоўніка — і на пенсію». Першая пенсія прыйшла ўжо на арыштанцкі рахунак
Адзін з суразмоўцаў «Нашай Нівы» расказаў, як перасёкся ў СІЗА КДБ з палкоўнікам Дэпартамента фінансавых расследаванняў Аляксандрам Кійко, які трапіў туды літаральна на наступны дзень, як атрымаў новыя пагоны. Даведаўшыся пра гэта, іншы арыштант — менеджар «Мінскэнерга», — радаваўся і танцаваў, таму што аказалася: гэта якраз Кійко яго распрацоўваў і ўпёк у камеру.
Адзін з суразмоўцаў «Нашай Нівы», які праходзіў пра СІЗА КДБ у 2024 годзе, расказаў феерычную гісторыю пра аднаго са сваіх сукамернікаў, які трапіў у камеру неўзабаве (па словах — на наступны дзень) пасля атрымання палкоўніцкіх пагонаў у Дэпартаменце фінансавых расследаванняў Камітэта дзяржаўнага кантролю.
Гаворка ідзе пра Аляксандра Кійко. Пасада на момант затрымання невядомая, але летам 2019‑га ён атрымліваў з рук тагачаснага кіраўніка КДК Леаніда Анфімава медаль «За бездакорную службу» як начальнік гарадскога міжраённага аддзела №2 упраўлення ДФР КДК па Мінскай вобласці.
Паводле дадзеных Belpol, Аляксандр Кійко нарадзіўся ў 1973 годзе, пачаў сваю кар'еру ў органах у 1994‑м як кантралёр Следчага ізалятара №1 («Валадаркі).
У 1996‑м перайшоў ва ўчастковыя, потым — у патрульныя. У 1998 годзе звольніўся. У 2003 годзе пайшоў працаваць інспектарам у ДФР.
Чым канкрэтна займаўся Кійко на службе, невядома. Але вядома, што за краты ён трапіў па абвінавачванні ў атрыманні хабару.
«Кійко віну прызнаў і са следствам супрацоўнічаў, праўда, у камеры не расказваў, як і колькі браў і ці браў увогуле. Але казаў, што жонцы ягоная работа не падабалася і яна ўгаворвала яго звольніцца са службы, маўляў, не трэба мне нічога, а вось пойдзеш да прыватніка — мне будзе лепш. А ён адказваў, што яшчэ рана, маўляў, да палкоўніка дацягну — і тады звольнюся!
У выніку палкоўніка ён атрымаў — і адразу яго затрымаў КДБ па эпізодзе хабара. І вось бухгалтар ДФР перавяла яго першую палкоўніцкую пенсію разам з бонусамі за выслугу і заробкам на ягоны арыштанцкі рахунак у КДБ. Адкрылася акенца, і супрацоўнік «Амерыканкі» закрычаў матам, маўляў, Кійко, як гэта разумець, як здзек з супрацоўнікаў КДБ? Цябе ж потым пераводзіць у іншы ізалятар будуць, і мне па законе трэба будзе наяўнымі выдаць усё — 14 тысяч рублёў!» — расказаў нам былы вязень.
Потым наш суразмоўца трапіў у іншы ізалятар, ужо не сістэмы КДБ, а сістэмы МУС.
Зайшоўшы ў камеру ён, канечне ж, адказваў на пытанні яе насельнікаў і расказваў, з кім і пры якіх абставінах перасякаўся раней.
«Ну і адзін чалавек кажа: пачакай, з кім-кім ты сядзеў? З Кійко? З ДФР? Пасля гэтага пляскае ў далоні і пачынае смяяцца, радавацца і прытанцоўваць. Я пытаюся, што такое? Аказваецца, што чалавек, якога так узрадавала навіна пра Кійко за кратамі — гэта былы начальнік упраўлення капітальнага будаўніцтва «Мінскэнерга» Дмітрый Шыкула, якога Аляксандр Кійко «распрацоўваў» і якому выносіў пастанову на арышт. Шыкула, мякка кажучы, быў не згодны з аргументамі следства і шчыра парадаваўся, што яго яшчэ нават не адправілі ў калонію, а аператыўнік па яго справе ўжо таксама трапіў за краты», — дадаў наш суразмоўца.
Дзмітрыя Шыкулу, а разам з ім вядучага інжынера філіяла «Белэнергацепласецьбуд» Максіма Ярохіна і начальніка філіяла Рамана Савіна пачалі судзіць у судзе Ленінскага раёна Мінска ў жніўні 2024 па трох артыкулах, звязаных з атрыманнем хабару.
Далейшы ягоны лёс, як і лёс Аляксандра Кійко, невядомыя.
«Наша Нiва» — бастыён беларушчыны
ПАДТРЫМАЦЬЦяпер чытаюць
Былы міністр культуры Руслан Чарнецкі знайшоў сабе падпрацоўку6
Каментары
Зараз амапау́цы , карнікі , вертухаі