Netflix расказаў пра неверагодны поспех серыяла «Вельмі дзіўныя справы». Серыял уплывае на ўсе сферы жыцця
К выхаду апошняй серыі культавага серыяла «Вельмі дзіўныя справы» (Stranger Things) Netflix падвёў вынікі дзевяцігадовага існавання свайго галоўнага хіта. Серыял не толькі ўплывае на сучасную культуру і жыццё маладога пакалення, але і служыць магутным эканамічным рухавіком для цэлых штатаў.
Эксклюзіўную статыстыку апублікавала выданне Variety.
Лічбы ўражваюць: агульная колькасць праглядаў серыяла за ўвесь час перавысіла 1,2 мільярда. Гэты паказчык ставіць «Вельмі дзіўныя справы» вышэй за любы іншы праект у гісторыі Netflix. Хоць асобныя сезоны «Вэнздэй» і «Гульні ў кальмара» маюць больш праглядаў, чым чацвёрты сезон «Дзіўных спраў», ніводзін іншы серыял не можа пахваліцца такой агульнай папулярнасцю.
Пяты сезон ужо пабіў рэкорд Netflix па колькасці праглядаў за першы тыдзень для англамоўнага серыяла, а ўсяго за 25 дзён яго першы том набраў 102,6 мільёна праглядаў.
Феномен у тым, што новыя серыі прымушаюць гледачоў вяртацца да папярэдніх: упершыню ў гісторыі стрымінгу ўсе пяць сезонаў аднаго шоу адначасова апынуліся ў топ-10 самых папулярных праектаў тыдня.
Уплыў серыяла выйшаў далёка за межы экранаў, змяніўшы нават музычныя чарты і спажывецкія звычкі. Дзякуючы чацвёртаму сезону песня Кейт Буш «Running Up That Hill» праз 38 гадоў пасля выхаду ўпершыню трапіла ў топ-10 амерыканскіх хіт-парадаў.
Аналагічны лёс напаткаў і кампазіцыю Metallica «Master of Puppets». Пяты сезон працягнуў гэтую традыцыю: па даных Spotify, праслухоўванні песні Даяны Рос «Upside Down» сярод моладзі выраслі на 1250%.
Нават замарожаныя вафлі Eggo, любімая ежа гераіні Адзінаццаць, перажылі сапраўдны рэнесанс: пасля выхаду другога сезона іх продажы падскочылі на 14%. Падобны бум адбыўся і з настольнай гульнёй Dungeons & Dragons, пастаянныя адсылкі да якой павялічылі цікавасць да яе на 673%.
Серыял стаў і магутным эканамічным рухавіком. З 2016 года праект стварыў больш за 8000 працоўных месцаў у ЗША і ўнёс 1,4 мільярда даляраў у ВУП краіны. Найбольшую выгаду атрымаў штат Джорджыя, дзе праходзіла большая частка здымак.
Акрамя таго, быў створаны цэлы сусвет вакол «Дзіўных спраў»: прададзена больш за 3,1 мільёна кніг і коміксаў, а жывое мерапрыемства «Stranger Things: The Experience» наведалі 850 тысяч чалавек у Лос-Анджэлесе, Лондане, Парыжы і іншых гарадах. П'еса-прыквел «Stranger Things: The First Shadow», якая дэбютавала ў Лондане, атрымала чатыры прэміі «Тоні» і дзве прэміі «Аліўе».
Але галоўная спадчына серыяла — гэта цэлае пакаленне маладых акцёраў, якіх ён ператварыў у сусветных зорак. Мілі Бобі Браўн (Адзінаццаць) стала адной з галоўных фігур Netflix, а Сэйдзі Сінк (Макс), Джозэф Куін (Эдзі) і Мая Хоўк (Робін) атрымалі ролі ў буйных галівудскіх праектах, у тым ліку ў кінасусвеце Marvel. Іх папулярнасць бачная і ў сацыяльных сетках: колькасць падпісчыкаў Мілі Бобі Браўн у Instagram вырасла з 2,1 мільёна да 68 мільёнаў.
Як пісала Variety яшчэ ў 2023 годзе, «Вельмі дзіўныя справы» больш, чым любы іншы серыял, даказалі жахлівую моц Netflix, з кожным сезонам ахопліваючы ўсё большую глабальную аўдыторыю. Фінал серыяла, які выйшаў на Новы год, упершыню ў гісторыі стрымінгу быў паказаны ў кінатэатрах ЗША і Канады і стаў годным завяршэннем цэлай эпохі.
Каментары