Ціханоўская падарыла Наўроцкаму некалькі кніг на беларускай мове. Якія?
Гэта адзін з любімых пісьменнікаў польскага прэзідэнта.
У варшаўскім палацы Бельведэр 13 студзеня прайшоў калядны прыём у прэзідэнта Польшчы Караля Наўроцкага. На яго па традыцыі запрасілі прадстаўнікоў беларускай дыяспары. У гэты ж дзень была сустрэча Наўроцкага і Святланы Ціханоўскай. Яе дарадца Дзяніс Кучынскі расказаў «Нашай Ніве» пра некаторыя дэталі.
Ціханоўская і Наўроцкі абмеркавалі геапалітычныя пытанні, падтрымку беларусаў у Польшчы, супрацоўніцтва паміж прэзідэнтам Польшчы і беларускімі дэмакратычнымі сіламі. Пагаварылі і пра культуру.
Адзін з любімых пісьменнікаў Наўроцкага — Сяргей Пясецкі, які нарадзіўся ў Беларусі.
«Святлана Ціханоўская падарыла прэзідэнту беларускія пераклады Пясецкага. Гэта адзін з ягоных самых улюбёных аўтараў. Яна падарыла яго ўлюбёную кнігу «Каханак Вялікай Мядзведзіцы», а таксама «Менскую трылогію», — падзяліўся Кучынскі. —
Прэзідэнт адзначыў: «У Польшчы яе называюць «Зладзейская трылогія», але я цудоўна ведаю, што большасць дзеянняў у ягоных кнігах адбываецца ў Беларусі», — і падкрэсліў, што гэта «выдатны прыклад таго, як нашы культура і гісторыя ўзаемазвязаныя». І Сяргей Пясецкі — адзін з вельмі дакладных сімбаляў гэтай супольнай польска-беларускай літаратуры і гісторыі».
Кучынскі дадаў, што на сустрэчы дамовіліся, што будуць шукаць магчымасць усе кнігі Пясецкага перакласці на беларускую мову.
Наўроцкі цікавіўся таксама тэатральнымі пастаноўкамі паводле Пясецкага.
«Ён казаў, што ў Польшчы меў досвед працы з праектамі спектакляў, пастаўленых па ягоных кнігах, і пытаўся пра беларускія пастаноўкі — і пра тое, ці можна было б паказваць такія працы ў Польшчы для беларускай аўдыторыі. Мы адзначылі, што такі досвед ужо ёсць: напрыклад, «Запіскі афіцэра Чырвонай арміі» ставілі купалаўцы. І мы абмеркавалі, як развіваць падобныя пастаноўкі па Пясецкім у Польшчы».
Закранулі таксама тэму гістарычнай памяці. «Мы прапанавалі канцэпт таго, як мог бы выглядаць Інстытут нацыянальнай памяці ў беларускім кантэксце, і прэзідэнт сказаў, што найбліжэйшым часам пазнаёміць нас з кіраўніцтвам Інстытута нацыянальнай памяці Польшчы».
Абмяркоўвалі таксама магчымыя супольныя памятныя і культурныя мерапрыемствы для беларусаў і палякаў.
Пракуратура пра смерць Мелказёрава: журналіст меў хранічную хваробу17
Каментары