Малады немец танчыць пад «Касіў Ясь канюшыну» — беларускі ў захапленні. Да гэтага ён ужо сабраў армію фанатак з Расіі
Нямецкія рэйверы, якія выпадкова сталі кумірамі расійскіх жанчын, дабраліся і да беларускага кантэнту. Адзін з іх запісаў ролік пад легендарную «Касіў Ясь канюшыну». Рэакцыя беларусак не прымусіла сябе чакаць.
У канцы снежня 2025 года ў сацсетках завірусілася відэа з напаўаголенымі нямецкімі рэйверамі, якія танчылі пад трэк Vielleicht Vielleicht.
Невядома, як так сталася, але відэа стала вельмі папулярным у расійскай аўдыторыі, дзе нямецкае слова сталі вымаўляць як «філяй».
Танцора Самуэля Дамена расіянкі ахрысцілі Сямёнам і завалілі яго кампліментамі на рускай мове. Напачатку хлопец папрасіў падпісчыц не пісаць яму на рускай, бо ён не разумее, а потым і зусім стаў выдаляць такія каментары.
Праз некаторы час ён і ягоныя сябры ўсё ж вырашылі не адмаўляцца ад папулярнасці сярод рускамоўнай аўдыторыі.
Апроч Самуэля, якога празвалі Сямёнам, папулярнасць атрымалі mikee.mej (Mekcho), якога празвалі Мішам, і t.x prince (Jannick), якога празвалі Іванам.
Спачатку адзін з іх станчыў пад трэк «Матушка земля», пасля чаго ў «Вані» пачалі з'яўляцца відэа, запісаныя на рускай мове, у тым ліку разам з «Мішам».
Так званы Ваня пайшоў далей і выклаў ролік, дзе танцуе пад рэмікс «Касіў Ясь канюшыну», тым самым узарваўшы ўжо беларускую аўдыторыю. Адметна, што другое жыццё легендарнаму трэку даў беларускі тэхна-гурт Police in Paris, дзе грае ўнук Уладзіміра Мулявіна — Улад Мулявін.
Пад відэа тысячы каментароў ад беларусак. Самыя папулярныя гучаць так: «У панядзелак дойдзе да Лукашэнкі», «Два мяхі бульбы гэтаму хлопцу», «Год беларускай жанчыны ўжо акупіўся».
Каментары
"Клуб адзінокіх ... ну няхай "сэрцаў" :)))