Бізнэсмен аднаўляе сядзібу Радзівілаў і адкрыў побач лазневы комплекс
За 15 км ад Мінска прапануюць папарыцца, як у 16 стагоддзі.
Нейкі час гэты маёнтак за 15 км ад Мінска належаў Радзівілам, пасля перайшоў да дынастыі шляхцічаў Ельскіх. Пры іх у Ігнацічах жыццё віравала: развівалася сельская гаспадарка і жывёлагадоўля, і нават была закладзена буйная прыдворная кветкавая гаспадарка.
Да нашых дзён тут захаваліся рэдкія для Беларусі віды дрэў. Напрыклад, лістоўніца, якой без малога 200 гадоў, расказвае СТБ.
Але ў пачатку XX стагоддзя маёнтак стаў безгаспадарным і паступова разбураўся. Бізнэсовец Алег Скробаў успамінае, як больш за 10 гадоў таму прыехаў сюды ў пошуку памяшкання пад аўтасэрвіс. Але, убачыўшы сапраўды гістарычную жамчужыну, вырашыў аднавіць сядзібу.
«Яна была ў закінутым стане. Было ў падвале вады па калена. Відаць было, што будынак проста запушчаны. Стала рэальна яго шкада. Хацелася менавіта аднаўленнем заняцца, выратаваць яго».
Абшарпаныя сцены, выбітыя вокны і дзверы, дах, які працякаў, забітыя смеццем коміны… Толькі два гады сышло на тое, каб асушыць затоплены склеп і правесці аварыйныя працы.
Як прызнаецца Алег, за гэтыя гады на аднаўленне сышло сотні тысяч рублёў. У асноўным усё робіць уласнымі сіламі. Разам з рабочымі адрамантавалі падлогі, замянілі вокны, уручную ачысцілі драўляныя рамы і дзверы. Пастараліся ўзнавіць карціну таго, як усё было ўладкавана ўнутры сядзібы шмат гадоў таму.
«Калі прыбіралі смецце з падлогі, выявілі стары падмурак. Было зразумела, што гэта быў камін. Мы знайшлі старога печніка, які нам аднавіў прыкладна, як ён быў», — расказвае Скробаў.
Каб хоць неяк адбіць велізарныя ўкладанні, уладальнік сядзібы аднавіў лазню, якая размяшчалася на тэрыторыі Ігнацічаў, зрабіўшы з яе прасторны лазневы комплекс і гасцявы дом.
Тут можна спыніцца і паспытаць стравы па старадаўніх рэцэптах. У комплексе прапануюць пазнаёміцца з метадамі парання 16 стагоддзя.
Цяпер чытаюць
Арыштавалі прадстаўнікоў кампаніі Bayer у Беларусі4
Каментары