У выпадку нападу з боку ЗША Іран нанясе ўдары па амерыканскіх базах у суседніх краінах Персідскага заліва, заявіў кіраўнік Міністэрства замежных спраў Ірана Абас Арагчы ў інтэрв’ю Al Jazeera пасля перамоў з Вашынгтонам у Амане.
«Калі Іран падвергнецца нападу, мы ўдарым па амерыканскіх базах у рэгіёне», — сказаў ён.
Пры гэтым Арагчы падкрэсліў, што такая атака не будзе нападам на суседнія краіны, паколькі існуе розніца «паміж нападам на базы і нападам на суседнія дзяржавы». Ён дадаў, што рызыка вайны існуе, і Іран гатовы да любога сцэнару.
Напярэдадні ў Маскаце адбыліся ўскосныя перамовы Ірана і ЗША пры пасярэдніцтве Амана. Арагчы назваў іх «добрым стартам», паведаміўшы пра абмен пунктамі гледжання ў «пазітыўнай атмасферы», але адзначыў, што працяг залежыць ад «кансультацый у нашых сталіцах».
У той жа час бакі дамовіліся пра прадаўжэнне перамоўнага працэсу, аднак фармат і даты наступных раўндаў будуць вызначаныя падчас далейшых кансультацый пры пасярэдніцтве кіраўніка МЗС Амана Бадра аль-Бусаіды.
Арагчы паведаміў, што праведзеныя перамовы тычыліся выключна ядзернай праблемы.
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары