У Швейцарыі правядуць рэферэндум адносна абмежавання колькасці насельніцтва
Швейцарыя гэтым летам правядзе рэферэндум з ініцыятывы правай Швейцарскай народнай партыі (SVP), якая прапануе абмежаваць насельніцтва краіны да 10 мільёнаў чалавек. Галасаванне прызначана на 10 чэрвеня, піша The Guardian.
Згодна з прапановай, улады павінны будуць прыняць меры, калі пастаяннае насельніцтва, якое цяпер складае каля 9,1 мільёна чалавек, перавысіць 9,5 мільёна. Тады плануецца абмяжоўваць уезд новых мігрантаў, у тым ліку ўцекачоў і сямейнікаў іншаземцаў.
Калі ж колькасць жыхароў дасягне 10 мільёнаў і не пачне скарачацца, Швейцарыя будзе абавязаная выйсці з пагаднення аб свабодным перамяшчэнні з ЕС — сваім галоўным гандлёвым партнёрам.
За апошняе дзесяцігоддзе насельніцтва краіны расло значна хутчэй, чым у сярэднім у дзяржавах Еўрасаюза. Каля 27% жыхароў не маюць швейцарскага грамадзянства. SVP сцвярджае, што рост насельніцтва прыводзіць да падаражання жылля і перагрузкі інфраструктуры.
У той жа час ініцыятыву рашуча крытыкуюць урад, парламент і бізнэс-супольнасць. Буйныя кампаніі, такія як Roche, UBS і Nestlé, папярэджваюць, што абмежаванні могуць паставіць пад пагрозу дамоўленасці з ЕС, у тым ліку пагадненне аб доступе да адзінага рынку.
Прадстаўнікі бізнэсу заяўляюць, што многія прадпрыемствы залежаць ад работнікаў з краін ЕС, а ў выпадку жорсткіх абмежаванняў яны могуць перанесці дзейнасць кампаній за мяжу, што негатыўна адаб’ецца на эканоміцы і бюджэце.
Паводле апытання, праведзенага ў снежні, каля 48% выбарцаў гатовыя падтрымаць ініцыятыву, што сведчыць пра падзел меркаванняў у грамадстве наконт таго, наколькі адкрытай павінна заставацца краіна.
Цяпер чытаюць
Някляеў апублікаваў злабадзённы верш. У ім згадваецца і Калеснікава з Бабарыкам, і Ціханоўская, і Пракоп'еў з Пазняком14
Каментары
Вось і адразу бачна каму выгадна прывозіць замежную працоўную сілу і плаціць ім мінімалку, замест таго каб нармалёва плаціць мясцовым. Асабліва смешна пра "гуманістаў" з Нестле, якія у свой час не грэбалі карыстацца працай рабоў у Афрыцы.