Швейцарцы прагаласавалі за дадатковыя выплаты пенсіянерам і адхілілі павышэнне пенсійнага ўзросту.
Па выніках агульнанароднага рэферэндуму ў Швейцарыі, які прайшоў у нядзелю, 58,2% грамадзян выказаліся за дадатковыя выплаты пенсіянерам — так званую «трынаццатую пенсію», піша Deutsche Welle.
Законапраект аб выплатах па аналогіі з «трынаццатай зарплатай», якую атрымліваюць работнікі ў Швейцарыі і многіх іншых краінах Еўропы, лабіравалі мясцовыя прафсаюзы і левыя партыі. Яўка на галасаванні па ўсёй краіне склала 58%.
Галасаванне на рэферэндумах у Швейцарыі патрабуе таго, каб за змены выказаліся не проста большасцю галасоў па краіне, але ў большасці з 26 кантонаў краіны, адзначаюць СМІ.
«Трынаццатую пенсію» падтрымалі ў 16 кантонах з 26 — гэта першы выпадак у Швейцарыі, калі прафсаюзам удалося за кошт прамой дэмакратыі дамагчыся рэалізацыі прапановы, якая прадугледжвае павелічэнне дзяржвыдаткаў.
Сярэдняя месячная пенсія ў рэспубліцы складае 2450 швейцарскіх франкаў (каля 2470 еўра) для адзінокіх і 3675 франкаў (каля 3854 еўра) для пар. Пры гэтым Швейцарыя — адна з самых дарагіх краін свету.
Швейцарцы не падтрымалі павышэнне пенсійнага ўзросту
Супраць новых выплат выступаў урад Швейцарыі. Улады лічаць, што гэта запатрабуе дадатковых бюджэтных выдаткаў у памеры больш за 4 млрд швейцарскіх франкаў у год і можа паставіць пад пагрозу стабільнасць сацыяльнай сістэмы. Прыхільнікам рэформы ўдалося мабілізаваць пратэстны электарат, адзначаюць эксперты.
Адначасова з пытаннем аб «трынаццатай пенсіі» на рэферэндум была вынесена прапанова аб павышэнні пенсійнага ўзросту ў Швейцарыі. Моладзевае аддзяленне Свабоднай дэмакратычнай партыі прапанавала павысіць узрост выхаду на пенсію на год — з 65 да 66 гадоў, а затым прывязаць яго да працягласці жыцця. 74,7 адсотка грамадзян прагаласавалі супраць гэтай ідэі.
Характэрна, што папярэдні рэферэндум па пытанні пенсійнага ўзросту ў Швейцарыі праходзіў толькі за паўтара года да цяперашняга — у верасні 2022 года краіна прагаласавала за тое, каб павысіць пенсійны ўзрост для жанчын на адзін год, з 64 да 65 гадоў. Мужчыны ў Швейцарыі таксама выходзяць на пенсію ў 65 гадоў.
Для параўнання, у Нямеччыне пенсійны ўзрост павышаецца паступова з 2012 года і да 2031 года дасягне 67 гадоў. У Беларусі пенсійны ўзрост у жанчын павысілі да 58 гадоў, для мужчын да 63 гадоў.
У цэлым, у Швейцарыі не занадта часта праводзяцца рэформы ў сістэме пенсійнага сацзабеспячэння — «трынаццатая пенсія» стала першай такой рэформай за апошнія дзясяткі гадоў. Але ў іншых эканамічных сферах швейцарцы не заўсёды падтрымліваюць «левыя» ідэі — да прыкладу, у 2016 годзе грамадзяне адмовіліся ад ідэі ўвядзення базавага безумоўнага даходу.
Цяпер чытаюць
Міжнародны крымінальны суд пачаў расследаванне злачынстваў, здзейсненых рэжымам Лукашэнкі20
Каментары