Палякі купляюць дамы ў Беларусі — цікавяцца, ці хопіць на жыццё еўрапейскай пенсіі, і радуюцца смешным выдаткам
Польскія тыктокі з беларускімі дамамі набіраюць тысячы праглядаў, а адмысловыя агенцтвы прадаюць дамы на любы густ па ўсёй Беларусі. Што адбываецца?
Нядаўна ў тыктоку заляцеў ролік польскага бюро нерухомасці Zakazane Państwo. У відэа, што набрала 128 тысяч праглядаў, патэнцыйным пакупнікам паказваюць хатку недалёка ад мястэчка Варапаева ў Пастаўскім раёне Віцебскай вобласці. За драўляную хату просяць каля 1300 даляраў.
Хата, пра якую ідзе гаворка, патрабуе рамонту. Гэта прызнаюць нават прадстаўнікі агенцтва — трэба пафарбаваць сцены са знешняга боку і адрамантаваць вокны. Але, мяркуючы па каментарах, кошт хаты спакушае некаторых палякаў:
«Мо, набуду сабе такую хатку на пенсію. Ведаю рускую, пасля дзевяці гадоў вучобы нешта засталося ў галаве з той мовы. Цішыня і спакой».
«Як на Падляшшы».
Ёсць, вядома, і тыя, хто сумняваецца. У прадстаўнікоў агенцтва цікавяцца, як беларусы ставяцца да палякаў і ці не будзе палякам складана набыць у Беларусі такую хату з зямлёй.
Агенцтва прапануе і хаты ў іншых кутках Беларусі: на іх старонцы можна знайсці, напрыклад, ролікі з-пад Смаргоні, з вёскі Загор’е ў Смалявіцкім раёне і ля Нарачы. Выпадковы каментатар пытаецца пад адным з ролікаў: нехта сапраўды набывае хату ў Беларусі? А яму тлумачаць: вы б здзівіліся, калі б даведаліся, колькі там палякаў.
«Я вывучаю тэму. Дакладна вечная арэнда, 99 гадоў — мне гэтага хопіць. Магчымасць продажу праз пяць гадоў, яшчэ не ведаю, як там з выкупам ва ўласнасць.
Буду [набываць] сёлета, знаёмыя ўжо набылі. Выдаткі на ўтрыманне для нас смешныя. Напрыклад, газ для ацяплення — каля 20 грошаў за куб (прыкладна 16 капеек — НН)», — піша адзін з палякаў у каментарах.
Вечная арэнда датычыць зямлі, на якой стаяць хаты. Замежнікі могуць набываць у Беларусі дамы, але не зямлю — на яе трэба будзе афармляць тую самую вечную арэнду на 99 гадоў. Ёсць і выключэнне: замежнік можа атрымаць зямлю ў Беларусі ў спадчыну.
Мяркуючы па каментарах да тыктокаў, палякі разглядаюць Беларусь яшчэ і як месца для жыцця на пенсіі. Адна з карыстальніц удакладняе, ці хапіла б ёй для жыцця ў Беларусі пенсіі памерам 1200 еўра. Яе супакойваюць:
«Увогуле, будзеце выдаткоўваць максімум 400‑450 еўра з 1200, і на таксі яшчэ ездзіць. На астатнія будзеце ў Турцыю лётаць кожныя паўгода на два тыдні».
У адным з каментароў агенцтва тлумачыць, што праз іх палякі набылі дзевяць дамоў у Беларусі.
Ёсць і іншыя платформы, якія прадаюць палякам іх беларускую мару. Напрыклад, на Domaza можна знайсці кватэры і дамы, і збольшага гэта варыянты ў Мінску і ў гарадах-спадарожніках. Самы танны варыянт — хата ў мястэчку Лашаны, што ў Мінскім раёне, за яе палякам давядзецца аддаць каля 39 тысяч даляраў.
А платформа Rielt прапануе невялічкі гайд па тым, як палякам выбіраць сабе нерухомасць у Беларусі. Паводле яго, самыя танныя хаты, ад 20 тысяч даляраў, можна знайсці ў аддаленых раёнах Віцебскай вобласці, вось толькі ў іх трэба будзе рабіць рамонт. На Магілёўшчыне і Гомельшчыне хаты, пішуць палякі, каштуюць 30‑50 тысяч даляраў, але ў тых рэгіёнах мала працы і слабая інфраструктура.
Калі ёсць грошы, аўтары гайда раяць разглядаць дамы ў Мінскім раёне, асабліва ў Бараўлянах, Ждановічах і Ратамцы — маўляў, добрая інфраструктура і файны варыянт для тых, хто працуе ў Мінску. А яшчэ можна выбраць раён Дзяржынска, Лагойска ці Заслаўя, дзе лепей з прыродай, ці блізкія да Польшчы Берасцейшчыну або Гродзеншчыну.
«Наша Нiва» — бастыён беларушчыны
ПАДТРЫМАЦЬ
Каментары