Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam
Polskija tyktoki ź biełaruskimi damami nabirajuć tysiačy prahladaŭ, a admysłovyja ahienctvy pradajuć damy na luby hust pa ŭsioj Biełarusi. Što adbyvajecca?
Niadaŭna ŭ tyktoku zalacieŭ rolik polskaha biuro nieruchomaści Zakazane Państwo. U videa, što nabrała 128 tysiač prahladaŭ, patencyjnym pakupnikam pakazvajuć chatku niedaloka ad miastečka Varapajeva ŭ Pastaŭskim rajonie Viciebskaj vobłaści. Za draŭlanuju chatu prosiać kala 1300 dalaraŭ.
Chata, pra jakuju idzie havorka, patrabuje ramontu. Heta pryznajuć navat pradstaŭniki ahienctva — treba pafarbavać ścieny sa źniešniaha boku i adramantavać vokny. Ale, miarkujučy pa kamientarach, košt chaty spakušaje niekatorych palakaŭ:
«Mo, nabudu sabie takuju chatku na piensiju. Viedaju ruskuju, paśla dzieviaci hadoŭ vučoby niešta zastałosia ŭ hałavie z toj movy. Cišynia i spakoj».
«Jak na Padlaššy».
Jość, viadoma, i tyja, chto sumniavajecca. U pradstaŭnikoŭ ahienctva cikaviacca, jak biełarusy staviacca da palakaŭ i ci nie budzie palakam składana nabyć u Biełarusi takuju chatu ź ziamloj.
Ahienctva prapanuje i chaty ŭ inšych kutkach Biełarusi: na ich staroncy možna znajści, naprykład, roliki z-pad Smarhoni, ź vioski Zahorje ŭ Smalavickim rajonie i la Naračy. Vypadkovy kamientatar pytajecca pad adnym z rolikaŭ: niechta sapraŭdy nabyvaje chatu ŭ Biełarusi? A jamu tłumačać: vy b ździvilisia, kali b daviedalisia, kolki tam palakaŭ.
«Ja vyvučaju temu. Dakładna viečnaja arenda, 99 hadoŭ — mnie hetaha chopić. Mahčymaść prodažu praź piać hadoŭ, jašče nie viedaju, jak tam z vykupam va ŭłasnaść.
Budu [nabyvać] sioleta, znajomyja ŭžo nabyli. Vydatki na ŭtrymańnie dla nas śmiešnyja. Naprykład, haz dla aciapleńnia — kala 20 hrošaŭ za kub (prykładna 16 kapiejek — NN)», — piša adzin z palakaŭ u kamientarach.
Viečnaja arenda datyčyć ziamli, na jakoj stajać chaty. Zamiežniki mohuć nabyvać u Biełarusi damy, ale nie ziamlu — na jaje treba budzie afarmlać tuju samuju viečnuju arendu na 99 hadoŭ. Jość i vyklučeńnie: zamiežnik moža atrymać ziamlu ŭ Biełarusi ŭ spadčynu.
Miarkujučy pa kamientarach da tyktokaŭ, palaki razhladajuć Biełaruś jašče i jak miesca dla žyćcia na piensii. Adna z karystalnic udakładniaje, ci chapiła b joj dla žyćcia ŭ Biełarusi piensii pamieram 1200 jeŭra. Jaje supakojvajuć:
«Uvohule, budziecie vydatkoŭvać maksimum 400‑450 jeŭra z 1200, i na taksi jašče jeździć. Na astatnija budziecie ŭ Turcyju lotać kožnyja paŭhoda na dva tydni».
U adnym z kamientaroŭ ahienctva tłumačyć, što praź ich palaki nabyli dzieviać damoŭ u Biełarusi.
Jość i inšyja płatformy, jakija pradajuć palakam ich biełaruskuju maru. Naprykład, na Domaza možna znajści kvatery i damy, i zbolšaha heta varyjanty ŭ Minsku i ŭ haradach-spadarožnikach. Samy tanny varyjant — chata ŭ miastečku Łašany, što ŭ Minskim rajonie, za jaje palakam daviadziecca addać kala 39 tysiač dalaraŭ.
A płatforma Rielt prapanuje nievialički hajd pa tym, jak palakam vybirać sabie nieruchomaść u Biełarusi. Pavodle jaho, samyja tannyja chaty, ad 20 tysiač dalaraŭ, možna znajści ŭ addalenych rajonach Viciebskaj vobłaści, voś tolki ŭ ich treba budzie rabić ramont. Na Mahiloŭščynie i Homielščynie chaty, pišuć palaki, kaštujuć 30‑50 tysiač dalaraŭ, ale ŭ tych rehijonach mała pracy i słabaja infrastruktura.
Kali jość hrošy, aŭtary hajda rajać razhladać damy ŭ Minskim rajonie, asabliva ŭ Baraŭlanach, Ždanovičach i Ratamcy — maŭlaŭ, dobraja infrastruktura i fajny varyjant dla tych, chto pracuje ŭ Minsku. A jašče možna vybrać rajon Dziaržynska, Łahojska ci Zasłaŭja, dzie lepiej z pryrodaj, ci blizkija da Polščy Bieraściejščynu abo Hrodzienščynu.
«Naša Niva» — bastyjon biełaruščyny
PADTRYMAĆCiapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia4
Kamientary