Прэзідэнт Украіны адзначыў, што за чатыры гады поўнамаштабнай вайны ён чуў шмат розных паведамленняў.
Украіна не баіцца пагроз з боку Ірана, заявіў прэзідэнт Украіны Уладзімір Зяленскі ў інтэрв’ю i24news, піша УНІАН.
Паводле слоў Зяленскага, за апошнія чатыры гады, гэта значыць з пачатку поўнамаштабнага расійскага ваеннага ўварвання ва Украіну, ён чуў шмат такіх паведамленняў.
«Глядзіце, нічога новага. Я чуў за гэтыя чатыры гады шмат розных паведамленняў. Мы не баімся ніякіх такіх паведамленняў. Мы жывём у такіх паведамленнях штодня апошнія чатыры гады, мінімум чатыры, але ў асноўным 12 гадоў. Таму для нас гэта не нешта новае», — заявіў прэзідэнт Украіны.
Таксама ён з упэўненасцю заявіў, што Расія дапамагае Ірану, пастаўляючы беспілотнікі, паколькі ў збітым на Блізкім Усходзе шахедзе былі выяўлены расійскія дэталі.
«Так, я ўпэўнены. Мы бачылі некаторыя дэталі з аднаго з «шахедаў», які быў знішчаны ў адной з краін Блізкага Усходу. Гэта былі расійскія дэталі. Мы ведаем гэта, бо іранцы іх не выраблялі. Таму я думаю, гэта азначае, што расіяне таксама дапамагаюць ім, як іранцы дапамагалі ім на самым пачатку вайны, калі яны далі ім «шахеды», — адзначыў Зяленскі.
На мінулым тыдні старшыня Камісіі па нацыянальнай бяспецы парламента Ірана Ібрагім Азізі заявіў, што любая дапамога Украіны Ізраілю, уключаючы беспілотнікі, робіць усю ўкраінскую тэрыторыю «законнай мэтай» для ракетных удараў Тэгерана.
Прадстаўнік Міністэрства замежных спраў Украіны Георгій Ціхі нагадаў, што іранскі рэжым гадамі падтрымлівае забойствы ўкраінцаў, паколькі дае Расіі дроны і тэхналогіі для вайны супраць Украіны. Ціхі назваў абсурднымі пагрозы Украіне з боку прадстаўнікоў гэтай краіны.
Ён дадаў, што «гэта ўсё роўна, што серыйны забойца апраўдваў бы свае злачынствы, спасылаючыся на крымінальны кодэкс».
Цяпер чытаюць
Расійскі прадавец паспяховага поспеху паспрабаваў адкрыць філіял у Мінску. Рэакцыя беларусаў была паказальнай6
Расійскі прадавец паспяховага поспеху паспрабаваў адкрыць філіял у Мінску. Рэакцыя беларусаў была паказальнай
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць3333
Каментары