16‑гадовая шахматыстка Настасся Обухава выйграла чэмпіянат Польшчы сярод моладзі да 20 гадоў і стала самай юнай удзельніцай дарослага індывідуальнага чэмпіянату, які прайшоў у Варшаве. Гісторыю беларускі расказаў Onet, заўважыла выданне Most.
Настасся родам з Гродна. Паводле яе слоў, рашэнне з'ехаць з Беларусі яе сям'я прыняла з-за пагаршэння сітуацыі ў краіне.
«Мы прыехалі ў 2022 годзе, таму што сітуацыя станавілася ўсё больш складанай і ўсё менш прадказальнай. Бацькі хацелі для нас лепшай будучыні і разумелі, што ў Польшчы ў мяне будзе больш магчымасцяў — і ў жыцці, і ў шахматах», — расказвае яна.
Па рэйтынгу ў Польшчы беларуска займае 47‑е месца, аднак змагла трапіць у дзясятку ўдзельніц чэмпіянату краіны дзякуючы перамозе на першынстве сярод шахматыстак да 20 гадоў.
Пасля пераезду Настасся пачала вучобу ў Беластоку, у школе №45, пры якой працуе адзін з наймацнейшых шахматных клубаў краіны — MUKS Stoczek. Там яна хутка адаптавалася і пачала паказваць высокія вынікі.
«Калі яна прыйшла да нас у восьмы клас, ужо была мацнейшай за большасць саперніц. Вельмі хутка ўлілася ў каманду і добра вучылася», — кажа прэзідэнт клуба і Падляшскага шахматнага саюза Лешак Зега.
Яшчэ ў Беларусі Настасся была прызёркай юніёрскіх чэмпіянатаў па хуткіх шахматах, аднак з-за абмежаванай колькасці турніраў яе рэйтынг заставаўся заніжаным. Ужо ў Польшчы ён пачаў імкліва расці — у першыя месяцы прыбаўляла да 145 пунктаў за месяц.
Цяпер яна выступае за Польшчу: атрымаць дакументы ўдалося адносна хутка дзякуючы польскім караням па лініі маці.
«Я прайшла трохмесячны курс мовы яшчэ да пераезду і хутка адаптавалася. Бацькам складаней: у іх менш практыкі польскай на працы», — кажа яна.
Настасся адзначае, што адным з галоўных адрозненняў паміж краінамі для яе сталі людзі.
«Беласток вельмі падобны да Гродна, але ў Польшчы людзі больш прыязныя. Я адчуваю сябе тут больш камфортна», — кажа дзяўчына.
Зараз яна адмовілася ад звычайнага школьнага навучання і вучыцца па індывідуальнай праграме.
«Школа заўсёды здавалася мне занадта павольнай. Цяпер я магу вучыцца самастойна і нашмат хутчэй. Дзякуючы гэтаму ў мяне больш часу на трэніроўкі», — тлумачыць яна.
На чэмпіянаце Польшчы Обухава заняла апошняе месца, але здолела дамагчыся нічыёй з дзейнай чэмпіёнкай Клаўдыяй Кулон. Сваім моцным бокам яна лічыць уменне пралічваць варыянты.
«Я хацела выціснуць максімум з кожнай партыі, але гуляю тут перш за ўсё дзеля вопыту. Я ўдзячная за магчымасць удзельнічаць, хоць, можа быць, гэта адбылося занадта рана: у мяне пакуль няма ўзроўню, каб паказаць сябе ў поўнай меры», — кажа маладая шахматыстка.
Цяпер чытаюць
У 2020 годзе ябацька Аміна «актыўна галасавала» за Лукашэнку. А цяпер не разумее, чаму родная маці на яе данесла, а міліцыя затрымала32
Каментары