16‑hadovaja šachmatystka Nastaśsia Obuchava vyjhrała čempijanat Polščy siarod moładzi da 20 hadoŭ i stała samaj junaj udzielnicaj darosłaha indyvidualnaha čempijanatu, jaki prajšoŭ u Varšavie. Historyju biełaruski raskazaŭ Onet, zaŭvažyła vydańnie Most.
Nastaśsia rodam z Hrodna. Pavodle jaje słoŭ, rašeńnie źjechać ź Biełarusi jaje siamja pryniała z-za paharšeńnia situacyi ŭ krainie.
«My pryjechali ŭ 2022 hodzie, tamu što situacyja stanaviłasia ŭsio bolš składanaj i ŭsio mienš pradkazalnaj. Baćki chacieli dla nas lepšaj budučyni i razumieli, što ŭ Polščy ŭ mianie budzie bolš mahčymaściaŭ — i ŭ žyćci, i ŭ šachmatach», — raskazvaje jana.
Pa rejtynhu ŭ Polščy biełaruska zajmaje 47‑ie miesca, adnak zmahła trapić u dziasiatku ŭdzielnic čempijanatu krainy dziakujučy pieramozie na pieršynstvie siarod šachmatystak da 20 hadoŭ.
Paśla pierajezdu Nastaśsia pačała vučobu ŭ Biełastoku, u škole №45, pry jakoj pracuje adzin z najmacniejšych šachmatnych kłubaŭ krainy — MUKS Stoczek. Tam jana chutka adaptavałasia i pačała pakazvać vysokija vyniki.
«Kali jana pryjšła da nas u vośmy kłas, užo była macniejšaj za bolšaść sapiernic. Vielmi chutka ŭliłasia ŭ kamandu i dobra vučyłasia», — kaža prezident kłuba i Padlašskaha šachmatnaha sajuza Lešak Zieha.
Jašče ŭ Biełarusi Nastaśsia była pryziorkaj junijorskich čempijanataŭ pa chutkich šachmatach, adnak z-za abmiežavanaj kolkaści turniraŭ jaje rejtynh zastavaŭsia zanižanym. Užo ŭ Polščy jon pačaŭ imkliva raści — u pieršyja miesiacy prybaŭlała da 145 punktaŭ za miesiac.
Ciapier jana vystupaje za Polšču: atrymać dakumienty ŭdałosia adnosna chutka dziakujučy polskim karaniam pa linii maci.
«Ja prajšła trochmiesiačny kurs movy jašče da pierajezdu i chutka adaptavałasia. Baćkam składaniej: u ich mienš praktyki polskaj na pracy», — kaža jana.
Nastaśsia adznačaje, što adnym z hałoŭnych adroźnieńniaŭ pamiž krainami dla jaje stali ludzi.
«Biełastok vielmi padobny da Hrodna, ale ŭ Polščy ludzi bolš pryjaznyja. Ja adčuvaju siabie tut bolš kamfortna», — kaža dziaŭčyna.
Zaraz jana admoviłasia ad zvyčajnaha školnaha navučańnia i vučycca pa indyvidualnaj prahramie.
«Škoła zaŭsiody zdavałasia mnie zanadta pavolnaj. Ciapier ja mahu vučycca samastojna i našmat chutčej. Dziakujučy hetamu ŭ mianie bolš času na treniroŭki», — tłumačyć jana.
Na čempijanacie Polščy Obuchava zaniała apošniaje miesca, ale zdoleła damahčysia ničyjoj ź dziejnaj čempijonkaj Kłaŭdyjaj Kułon. Svaim mocnym bokam jana ličyć umieńnie praličvać varyjanty.
«Ja chacieła vycisnuć maksimum z kožnaj partyi, ale hulaju tut pierš za ŭsio dziela vopytu. Ja ŭdziačnaja za mahčymaść udzielničać, choć, moža być, heta adbyłosia zanadta rana: u mianie pakul niama ŭzroŭniu, kab pakazać siabie ŭ poŭnaj miery», — kaža maładaja šachmatystka.
Pieršaja viasna na voli. Nina i Uładzimir Łabkovičy raskazali pra svaju historyju kachańnia i žyćcio paśla turmy
«Chaču naviedać babulu ŭ Biełarusi». Jak žyvuć i adaptujucca dzieci biełarusaŭ-emihrantaŭ u Jeŭropie
Biełaruskaja muzykantka trapiła na histaryčny fiestyval u Polščy — i ciapier šyje kaściumy roznych epoch
Brendavaja sumačka za $4 tysiačy i bryljanty. Vice-mis Biełarusi Alija Karotkaja schadziła ź siabroŭkaj pajeści dranikaŭ7
Brendavaja sumačka za $4 tysiačy i bryljanty. Vice-mis Biełarusi Alija Karotkaja schadziła ź siabroŭkaj pajeści dranikaŭ
Na Afonie adšukali try nieviadomyja raniej asobniki Astrožskaj Biblii. Dla jaje stvareńnia drukar Ivan Fiodaraŭ, vychadziec ź Biełarusi, vykarystoŭvaŭ teksty Skaryny66
Kamientary