Ізраільскі вайсковец кувалдай крышыў статую Ісуса Хрыста на поўдні Лівана
Прэм’ер-міністр Ізраіля ў выніку выбачыўся за гэта.
У сеціве разышлося фота, на якім ізраільскі салдат б’е кувалдай па статуі Ісуса Хрыста ў паўднёвым Ліване. Статуя знаходзілася каля прыватнага дома на ўскраіне вёскі Дэбель, дзе яшчэ заставаліся жыхары.
Прэм’ер-міністр Ізраіля Беньямін Нетаньяху ў выніку выбачыўся за гэта.
«Учора, як і пераважная большасць ізраільцян, я быў ашаломлены і засмучаны, даведаўшыся, што салдат ЦАХАЛ пашкодзіў каталіцкі рэлігійны сімвал у паўднёвым Ліване. Я асуджаю гэты ўчынак самым рашучым чынам. Ваенныя ўлады праводзяць крымінальнае расследаванне па гэтай справе і прымуць адпаведныя жорсткія дысцыплінарныя меры ў дачыненні да парушальніка», — напісаў Нетаньяху ў сацсетцы X па-англійску.
«Мы выказваем шкадаванне з нагоды гэтага інцыдэнту і за любы боль, які гэта прычыніла вернікам у Ліване і ва ўсім свеце».
Міністр замежных спраў Ізраіля Гідэон Саар заявіў: «Мы прыносім прабачэнні за гэты інцыдэнт кожнаму хрысціяніну, чые пачуцці былі закрануты».
Армія абароны Ізраіля паведаміла, што паводзіны іх салдата несумяшчальныя з тымі каштоўнасцямі, якія павінны быць у вайскоўцаў, і да датычных будуць прыняты адпаведныя меры. Статую абяцаюць аднавіць і вярнуць на месца.
Цяпер чытаюць
Віталь з-пад Вілейкі, які падпаліў хату з уласнымі дзецьмі, завербаваўся ў расійскае войска. І прапаў на першым жа баявым заданні5
Каментары