Расійскі сухагруз, які перавозіў расійскія ядзерныя рэактары для КНДР, маглі падбіць тарпедамі НАТА
Тэлеканал CNN паведаміў новыя падрабязнасці пра гібель расійскага сухагруза Ursa Major, які затануў у снежні 2024 года каля іспанскага ўзбярэжжа. Паводле інфармацыі журналістаў і матэрыялаў іспанскага расследавання, судна магло перавозіць для КНДР кампаненты ядзерных рэактараў для падводных лодак.
Капітан судна Ігар Анісімаў падчас допытаў паведаміў следчым, што пад выглядам «вечкаў люкаў», пазначаных у дакументах, на борце знаходзіліся элементы двух ядзерных рэактараў. Ён сцвярджаў, што яны не мелі ядзернага паліва. Мяркуецца, што груз мог накіроўвацца ў паўночнакарэйскі порт Расон.
Следчыя палічылі падазроным сам маршрут і склад грузу. Паводле іх версіі, два вялікія краны Liebherr, якія таксама былі на судне, маглі выкарыстоўвацца для разгрузкі рэактараў.
22 снежня судна пачало траціць ход і нахілілася. Пазней прагучалі некалькі выбухаў у раёне машыннага аддзялення, загінулі двое механікаў. На корпусе знайшлі адтуліну памерам каля 50 на 50 сантыметраў.
Іспанскія следчыя выказалі версію, што пашкоджанне магла выклікаць суперкавітацыйная тарпеда тыпу «Баракуда». Такія тарпеды здольныя рухацца на вельмі вялікай хуткасці ў газавай бурбалцы. Аднак шэраг экспертаў сумняваецца ў гэтай версіі і лічыць больш верагодным выкарыстанне магнітнай міны, замацаванай на корпусе судна. Тым больш што такія тарпеды ёсць на ўзбраенні толькі ў ЗША, Расіі, Ірана і некаторых краін НАТА.
Пасля эвакуацыі экіпажа расійскі карабель «Іван Грэн», які суправаджаў сухагруз, запускаў сігнальныя ракеты, а сейсмолагі зафіксавалі яшчэ чатыры выбухі ў раёне аварыі. Пазней да месца крушэння прыбывала расійскае судна «Янтар», якое ў краінах НАТА лічаць разведвальным.
CNN таксама паведамляе, што над месцам затаплення двойчы лётаў амерыканскі самалёт WC-135R, прызначаны для выяўлення слядоў ядзерных матэрыялаў у атмасферы.
Раней спецслужбы Паўднёвай Карэі заяўлялі, што Расія магла перадаваць КНДР тэхналогіі і кампаненты для стварэння атамных падлодак у абмен на дапамогу паўночнакарэйскіх вайскоўцаў у вайне супраць Украіны.
Ля берагоў Іспаніі затанула расійскае судна, якое забяспечвала групоўку ў Сірыі
Як ЗША выбудоўваюць новы сусветны парадак: кантроль над марскімі вузламі перадусім
Расійскі газавоз, падбіты ў Міжземным моры, пагражае экалагічнай катастрофай
З'явілася ВІДЭА, як французскія вайскоўцы бяруць на абардаж танкер расійскага ценявога флоту
Лукашэнка нервова пракаментаваў візіт Ціханоўскай у Кіеў45
Каментары