Хітры беларус змяніў імя і прозвішча, каб абысці забарону на ўезд у Фінляндыю. Але не пракаціла

Грамадзянін Беларусі, які раней атрымаў ад Фінляндыі двухгадовую забарону на ўезд у Шэнгенскую зону, вярнуўся на радзіму, змяніў там імя і прозвішча, аформіў новы пашпарт і польскую візу — і па новых дакументах зноў заехаў у Еўрасаюз праз Латвію. У сакавіку 2024 года яго затрымалі ў Таліне. Адміністрацыйны суд Таліна задаволіў хадайніцтва эстонскай паліцыі і дазволіў трымаць чалавека пад вартай да высылкі.

Пра гэта сведчыць пастанова Талінскага адміністрацыйнага суда (Tallinna Halduskohus) ад 14 сакавіка 2024 года па справе № 3-24-765. Імя і прозвішча фігуранта суд распарадзіўся схаваць у апублікаванай версіі рашэння.

Як з’явілася забарона на ўезд

Першапачаткова чалавек насіў іншае імя і прозвішча. 19 студзеня 2023 года Фінляндыя выдала яму прадпісанне аб выездзе, якім увяла забарону на ўезд у Шэнгенскую зону на два гады — з 8 лютага 2023‑га па 8 лютага 2025-га.

З Шэнгенскай зоны ён выехаў у апошні дазволены дзень, 8 лютага 2023 года.

Пазней у судзе высветлілася, што затрыманы нелегальна працаваў у Фінляндыі, а з краіны выехаў у Турцыю.

Новае імя, новы пашпарт і польская віза

Вярнуўшыся ў Беларусь, чалавек змяніў імя і прозвішча і атрымаў новы беларускі пашпарт ужо на новае імя (магчыма, гаворка ідзе пра выкарыстанне іншай транслітарацыі, а не пра поўную замену імені і прозвішча) — дакумент выдалі 17 лютага 2023 года тэрмінам да 17 лютага 2033-га. Затым ён аформіў польскую візу катэгорыі D, дзейную з 22 сакавіка 2023 года па 20 сакавіка 2024-га.

22 студзеня 2024 года беларус зноў уехаў на тэрыторыю краін Шэнгенскага пагаднення — праз Латвію, па новым беларускім пашпарце. Фармальна ў яго была дзейная польская доўгатэрміновая віза, аднак забарона на ўезд, накладзеная Фінляндыяй, працягвала дзейнічаць да лютага 2025 года.

Затрыманне ў Таліне

12 сакавіка 2024 года а 11:25 беларуса затрымаў памежнік Паўночнай прэфектуры Паліцэйска-памежнага дэпартамента (Politsei— ja Piirivalveamet, PPA) на талінскім памежным пункце на вуліцы Logi — у раёне пасажырскага порта. Затрыманне аформілі на 48 гадзін, а самога чалавека перавезлі ў цэнтр утрымання PPA ў вёсцы Соадэвахе воласці Раэ (Harjumaa).

Паводле матэрыялаў справы, Эстонію беларус выкарыстоўваў як транзітную краіну, каб трапіць у Фінляндыю, дзе планаваў працаваць. Эканамічных і сямейных сувязяў ні з Эстоніяй, ні з іншымі краінамі Шэнгена ў яго не было.

У той жа дзень, 12 сакавіка, паліцыя выдала яму новае прадпісанне аб выездзе і дадаткова ўвяла забарону на ўезд тэрмінам на пяць гадоў.

Што затрыманы казаў на допыце і ў судзе

Падчас гутаркі 12 сакавіка чалавек прызнаў, што ведаў пра забарону Фінляндыі і што менавіта праз яе змяніў сваё імя — каб зноў трапіць у Шэнген. Ён прызнаў, што парушыў эстонскі Закон аб замежніках, знаходзячыся ў Шэнгенскай зоне без законнай падставы.

На судовым пасяджэнні 13 сакавіка яго пазіцыя змянілася. Чалавек заявіў, што з хадайніцтвам паліцыі згодны, але не разумее, чаму высылка зацягваецца. Ён сцвярджаў, што іншых імёнаў у яго ніколі не было, а ў новым пашпарце імя проста запісана інакш, бо кірылічнае напісанне інакш перадаецца лацінкай. Новы пашпарт ён нібыта аформіў таму, што страціў папярэдні.

Суд палічыў гэтыя тлумачэнні непераканаўчымі: яны супярэчаць ранейшым паказанням, дзе чалавек прама казаў, што змяніў імя дзеля паўторнага ўезду. Затрыманы дадаў, што хоча вярнуцца дадому ў Беларусь, што мае дастаткова грошай арганізаваць пераезд самастойна і гатовы да канца працэдуры жыць у нейкім месцы пражывання, калі паліцыя дазволіць.

У выніку беларуса пакінулі пад вартай, каб арганізаваць дэпартацыю. Працэс павінен быў заняць не больш за месяц.

• 0
• 0
• 6
• 3
• 0
• 1
• 4
• 0