Кадэбэшнікі тэлефануюць беларусам у эміграцыі праз іх сяброў — чаго хочуць?
Сяброў Антона (імя змененае па просьбе героя) па чарзе пачалі выклікаць супрацоўнікі КДБ. Прычым сустрэчы прызначаліся хітрым шляхам — іх аператыўна выклікалі ці ў ДАІ, ці ў падатковую, ці ў пашпартны стол, але на месцы іх сустракалі супрацоўнікі КДБ.
Антон не жыве ў Беларусі з 2022 года. Першы раз сілавікі выйшлі на яго пару месяцаў таму, акурат праз сябра.
«Яны пазванілі мне з тэлефона сябра, каб я дакладна падняў слухаўку. Як я зразумеў, яны ж раней датэлефаноўваліся да мяне з беларускага нумара самі, але я ігнараваў», — расказвае мужчына.
«Таварыш адразу сказаў мне, што ён знаходзіцца ў атачэнні супрацоўнікаў органаў і са мной хочуць паразмаўляць. Кадэбіст назваў імя і больш ніякай інфы пра сябе не даў, сказаў: «Нельга». Адразу абазначыў, што бацькоў ён нібыта спецыяльна не турбаваў, бо яны ў гадах».
Найперш суразмоўцу цікавілі данаты на Полк Каліноўскага і наяўнасць жадання папоўніць яго шэрагі ці знаёмыя, якія ўжо служаць там.
«Ён адразу абазначыў, што ў іх ёсць усе спісы данацёраў, і я сярод гэтых шэрагаў».
Далей супрацоўнік пачаў распытваць пра дыяспару, хто арганізатар мітынгаў за мяжой, але Антон абазначыў, што пра іншых людзей размаўляць не збіраецца, толькі пра сябе.
«Ён запытаў мяне, ці хачу я вярнуцца ў Беларусь, і сказаў, што можа з гэтым дапамагчы. Тры разы паўтарыў «давай працаваць, і я табе дапамагу вярнуцца на радзіму». Але ясна, што ўсё гэта хлусня. На супрацоўніцтва з сілавікамі можа пагадзіцца толькі той, хто жыве ў танку».
Па інфармацыі суразмоўцы, супрацоўнікі КДБ таксама дапыталі іншых яго сяброў. Пасля гэтага тыя перасталі выходзіць з ім на сувязь і падтрымліваць хоць якую камунікацыю.
Таксама Антон распавёў, што нехта цягам амаль двух гадоў мэтанакіравана і няспынна спрабуе ўзламаць яго беларускі тэлеграм.
Раней мы расказвалі, як кадэбэшнікі спрабуюць вербаваць беларусаў-эмігрантаў праз іх бацькоў.
-
Больш за 60 чалавек затрыманыя пасля канцэрта Макса Каржа ў Франкфурце-на-Майне. Са сцэны спявак заклікаў спыніць вайну ва Украіне
-
Рыжанкоў спадзяецца на пацяпленне адносін з Польшчай
-
Протаіерэй Андрэй Лемяшонак паскардзіўся на праверкі. І назваў паездкі манашак Свята-Елісавецінскага манастыра па Еўропе «гераічнымі»
Каментары