Каля Белавежскай пушчы ствараюць музычную трасу з песняй «Песняроў»
У Беларусі ствараюць незвычайную музычную дарогу, якая будзе прайграваць мелодыю вядомай песні ансамбля «Песняры» — «Белавежская пушча». Новы ўчастак з’явіцца на трасе Брэст — Камянец — Белавежская пушча, на пад’ездзе да аднаго з галоўных сімвалаў краіны.
Даўжыня музычнага адрэзка складзе каля 700 метраў. Яго асаблівасць у тым, што падчас руху аўтамабіля па спецыяльным пакрыцці ў салоне будзе чуваць мелодыя песні. Такі эфект узнікае дзякуючы асаблівай тэхналогіі кладкі асфальту: паверхня дарогі ствараецца такім чынам, каб колы машыны пры руху «вычытвалі» патрэбны рытм і ператваралі яго ў музыку.
У аснову праекта паклалі кампазіцыю ансамбля «Песняры» — «Белавежская пушча». Мяркуецца, што такая дарога створыць для турыстаў асаблівую атмасферу яшчэ да прыезду ў запаведнік і зробіць маршрут больш запамінальным.
Гэта ўжо не першы падобны праект у Беларусі. Раней музычную дарогу зрабілі ў Гомельскай вобласці на трасе Бабруйск — Мазыр — мяжа Украіны. Там пры руху аўтамабіля таксама гучыць мелодыя песні «Белоруссия» ў выкананні «Песняроў».
Цяпер чытаюць
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты21
Каментары