Першая энцыкліка папы Льва XIV: ШІ не павінен стаць Вавілонскай вежай
Папа Леў XIV у панядзелак, 25 мая, прадставіў сваю першую энцыкліку пад назвай «Magnifica humanitas: пра абарону чалавечай асобы ў эпоху штучнага інтэлекту». «Галоўны выбар — гэта не выбар паміж «так» ці «не» тэхналогіям, а хутчэй паміж будаўніцтвам Вавілона або аднаўленнем Іерусаліма», — напісаў ён.
У сваёй першай энцыкліцы пантыфік заклікаў «раззброіць» ШІ, каб засцерагчы чалавецтва ад рызык, звязаных з гэтай тэхналогіяй. «Раззброіць» значыць не адпрэчыць тэхналогіі, а не дапусціць іх панавання над чалавецтвам», — патлумачыў сваю пазіцыю Папа.
У сваім праграмным звароце да Каталіцкай царквы Леў XIV таксама заклікаў вызваліць штучны інтэлект ад манапольнага кантролю «толькі нешматлікіх транснацыянальных карпарацый» і перасцярог ад выкарыстання гэтай тэхналогіі дзеля дасягнення геапалітычных ці камерцыйных выгад, піша Deutsche Welle.
Рызыка, паводле слоў Папы, заключаецца ў тым, што людзі будуць зведзены «да ролі звычайных вінцікаў у сістэме, скіраванай на ўсё большую эфектыўнасць».
Папа Леў выкарыстаў два біблійныя вобразы, каб апісаць выбар, перад якім стаіць чалавецтва.
«Галоўны выбар — гэта не выбар паміж «так» ці «не» тэхналогіям, а хутчэй паміж будаўніцтвам Вавілона або аднаўленнем Іерусаліма», — напісаў ён.
У Бібліі Вавілонская вежа сімвалізуе грандыёзны навязаны зверху праект, дзе рашэнні прымаюцца пад уплывам амбіцый, дзеля прыбытку любым коштам і які імкнецца ўсіх зрабіць аднолькавымі, піша Папа ў сваім тэксце. Пры аднаўленні ж Іерусаліма розныя людзі працавалі разам, каб адбудаваць разбураныя муры і вярнуцца да брацкага суіснавання, дадаў Папа.
«Невялікія, але надзвычай уплывовыя групы здольныя кіраваць інфармацыйнымі патокамі і спажывецкімі паводзінамі, дыктаваць ход дэмакратычных працэсаў і ўздзейнічаць на эканамічную дынаміку», — звярнуў увагу пантыфік.
Таму, паводле яго слоў,
«крайне важна, каб укараненне ШІ — асабліва ў тых сферах, дзе гаворка ідзе пра грамадскае дабро і фундаментальныя правы, — суправаджалася дакладнымі крытэрыямі і эфектыўнымі ахоўнымі механізмамі».
Папа прапанаваў распрацаваць «этычны кодэкс» для ШІ, заснаваны на крытэрыях агульнай сацыяльнай справядлівасці, а таксама забяспечыць рэгуляванне працэсаў апрацоўкі карыстальніцкіх даных.
Аднак, падкрэсліў ён, гэтыя меры акажуцца бескарыснымі, «калі маральныя рамкі будуць вызначацца толькі выбранымі».
Назіральнікі расцанілі гэтае выказванне як крытыку на адрас амерыканскіх тэхналагічных мільярдэраў.
У сваёй энцыкліцы Папа таксама рэзка раскрытыкаваў «культуру сілы», якая нармалізуе вайну і заахвочвае пераўзбраенне. Ён заклікаў пераадолець тэорыю «справядлівай вайны» — дактрыны, якая выкарыстоўвалася для апраўдання глабальных канфліктаў. Вайсковая сіла можа прымяняцца толькі для «самаабароны ў самым строгім сэнсе», упэўнены пантыфік.
Леў XIV таксама перасцярог ад прымянення зброі на аснове ШІ.
«Не існуе алгарытму, здольнага зрабіць вайну маральна прымальнай», — падкрэсліў ён.
Цяпер чытаюць
Малады работнік «Мінск-Арэны» павінен заплаціць 71 мільён даляраў3
Каментары