Расійская аэракасмічная кампанія «Бюро 1440», якая стварае расійскі аналаг амерыканскай сістэмы Starlink, страціла адзін з 16 сваіх першых серыйных спадарожнікаў, выведзеных на арбіту 23 сакавіка 2026 года. Пра гэта сведчаць даныя сэрвісаў маніторынгу касмічных апаратаў, піша «Коммерсант».
У кампаніі паведамілі, што цяпер на нізкай калязямной арбіце знаходзяцца шэсць эксперыментальных спадарожнікаў серый «Рассвет-1» і «Рассвет-2», а таксама 15 апаратаў з першай серыйнай партыі. Паводле іх слоў, гэтыя спадарожнікі паспяхова прайшлі праверку асноўных сістэм, выконваюць манеўры і працуюць у штатным рэжыме.
У «Бюро 1440» падкрэслілі, што страта аднаго апарата нібыта не паўплывае на тэрміны запуску камерцыйнага сэрвісу спадарожнікавай сувязі і не адаб’ецца на якасці паслуг.
Кампанія плануе да 2030 года стварыць групоўку з 292 спадарожнікаў, уключаючы рэзервовыя. Праект рэалізуецца ў рамках расійскай праграмы развіцця лічбавай эканомікі і прадугледжвае як дзяржаўнае, так і прыватнае фінансаванне.
Чакаецца, што спадарожнікавы шырокапалосны інтэрнэт ад сістэмы «Рассвет» стане даступны для карпаратыўных кліентаў у Расіі ў 2027—2028 гадах.
Каментары