На японскім востраве Кюсю 28 ліпеня адбыўся моцны землятрус, які сур'ёзна закрануў прэфектуру Кумамота. Падземныя штуршкі адбыліся ў 16:27 па мясцовым часе. Пасля іх улады арганізавалі эвакуацыю больш як 150 тысяч жыхароў у бяспечныя пункты. Папярэджанне пра магчымасць цунамі было абвешчана адразу пасля землятрусу, аднак прыкладна праз гадзіну яго скасавалі, паведамляе Бі-бі-сі.
Паводле японскіх СМІ, у выніку ўздзеяння стыхіі ёсць загінулыя. Асабліва цяжкая сітуацыя склалася ў гандлёвым цэнтры Aeon Mall, дзе пасля землятрусу абрынуўся другі паверх. Частка людзей апынулася пад заваламі. Тэлеканал Fuji TV паведаміў пра пацверджаныя смяротныя выпадкі, а паліцыя, па звестках тэлеканала TBS, лічыць, што колькасць загінулых можа быць значнай.
Прэм'ер-міністарка Японіі Санаэ Такаіці заявіла, што сапраўдны маштаб разбурэнняў і чалавечых страт яшчэ ўдакладняецца. Паводле яе слоў, ужо вядома пра пацярпелых, шматлікія адключэнні электраэнергіі, пажары, пашкоджанні дарог, мастоў і будынкаў. Для ліквідацыі наступстваў стыхіі па просьбе кіраўніцтва прэфектуры ў раён бедства накіравалі каля 3,6 тысячы вайскоўцаў Сіл самаабароны. Яны разам з мясцовымі службамі будуць працаваць кругласутачна, каб выратаваць людзей і ацаніць маштаб шкоды.
Паводле звестак дзяржаўнай тэлекампаніі NHK, у адной з бальніц ужо прынялі больш за 50 пацярпелых. Газета Nikkei паведамляе, што траўмы атрымалі таксама пасажыры хуткаснага цягніка, які знаходзіўся ў руху падчас землятрусу.
Стыхія нанесла сур'ёзныя пашкоджанні транспартнай інфраструктуры. На аўтамабільных дарогах з'явіліся вялікія расколіны, адзін грузавы цягнік сышоў з рэек, а на станцыі Яцусіра, паводле агенцтва Kyodo, перакуліўся яшчэ адзін цягнік. На аэрафотаздымках таксама бачна абрушэнне аднаго з мастоў.
З меркаванняў бяспекі на Кюсю спынены рух хуткасных цягнікоў «Сінкансэн» і мясцовых чыгуначных маршрутаў. Закрытая ўзлётна-пасадачная паласа аэрапорта Аса-Кумамота, адмяняюцца авіярэйсы.
Буйныя прамысловыя кампаніі таксама прынялі экстранныя меры. Вытворца мікрачыпаў TSMC эвакуяваў супрацоўнікаў свайго завода ў рэгіёне. Аналагічна зрабілі кампаніі Sony і Fujifilm, якія часова вывелі персанал са сваіх прадпрыемстваў.
У гандлёвым цэнтры Aeon Mall пасля першых падземных штуршкоў адбыўся выбух. Па інфармацыі пажарнікаў, некалькі чалавек аказаліся заблакаванымі ўнутры будынка. Прадстаўнікі кампаніі Aeon адзначылі, што наведвальнікаў і супрацоўнікаў паспелі эвакуяваць адразу пасля пачатку землятрусу, а прычына выбуху пакуль высвятляецца.
Міжнароднае агенцтва па атамнай энергіі паведаміла, што атамная электрастанцыя «Сэндай», размешчаная прыкладна за 100 кіламетраў ад эпіцэнтра, не атрымала пашкоджанняў і працягвае працаваць у штатным рэжыме.
Метэаралагічнае агенцтва Японіі папярэдзіла пра высокую верагоднасць моцных паўторных падземных штуршкоў, паколькі ачаг землятрусу знаходзіўся на невялікай глыбіні — каля 10 кіламетраў. На кадрах з месца здарэння відаць пашкоджаныя дарогі, масты і некалькі будынкаў, ахопленых пажарамі.
Японія ўваходзіць у лік найбольш сейсмічна актыўных краін свету — штогод там рэгіструецца каля паўтары тысячы землятрусаў. Апошняя буйная трагедыя ў прэфектуры Кумамота адбылася ў 2016 годзе, калі серыя магутных падземных штуршкоў забрала жыцці 278 чалавек.
Цяпер чытаюць
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1313
Каментары