Ці можна прадаваць хатнюю выпечку ўласнага прыгатавання ў сваім двары?
У сацыяльных сетках з’явілася відэа, дзе дзеці разам з бацькамі прадаюць у двары шматпавярховага дома хатні ліманад і выпечку. Аднак паводле беларускага заканадаўства рабіць гэта нельга, тлумачыць юрыстка выданню «Аргументы и факты в Беларуси».
Як патлумачыла адвакатка Крысціна Якута-Марчук, фізічныя асобы без статусу індывідуальнага прадпрымальніка могуць гандляваць толькі ў спецыяльна вызначаных мясцовымі ўладамі месцах. Пры гэтым пералік тавараў, дазволеных для такога продажу, абмежаваны.
Без рэгістрацыі ІП можна прадаваць, напрыклад, ужываныя нехарчовыя тавары, прадукцыю, сабраную ў дзікай прыродзе, а таксама сельскагаспадарчую прадукцыю, вырашчаную на ўласным зямельным участку.
Хатняя выпечка і іншыя прадукты ў гэты пералік не ўваходзяць. Таму продаж такой прадукцыі ў дварах жылых дамоў, а таксама на вуліцах, у парках, скверах і на стадыёнах забаронены. За незаконны гандаль можна атрымаць штраф.
Цяпер чытаюць
У Гомелі за палітыку асудзілі кіраўніка аб'яднання, якое шукае парэшткі ахвяраў вайны і сталінскіх рэпрэсій, і яго жонку-медсястру7
Каментары