Грамадства

Nashaniva.com

17.09.2026 / 07:43

Статкевіч: Учора было парушана ключавое правіла гандлю

Палітык у сваім тэлеграм-канале пракаментаваў учорашняе вызваленне палітвязняў, калі на свабоду выйшлі 25 чалавек.

«Як і многія беларусы, учора я радаваўся вызваленню чарговай групы палітвязняў і засмучаўся, што замест абяцанай прадстаўніком адміністрацыі ЗША іх вялікай колькасці, на волю выйшлі толькі 25 чалавек.

Шчыра кажучы, чаканы вынік. Бо было парушана ключавое правіла гандлю, якое павінны ведаць не толькі спецыялісты па «здзелках», але і любы звычайны пакупнік.

Калі купляеш нейкі тавар і загадзя пачынаеш публічна выказваць сваю зацікаўленасць у набыцці яго вялікай колькасці, то прадавец аўтаматычна падыме кошт гэтага тавару.

Разумею, што пан Коўл казаў тое, што з нецярпеннем чакалі пачуць ад яго тысячы беларусаў, але, калі маеш справу з прыроджаным (у літаральным сэнсе) гандляром, то варта прагназаваць яго рэакцыю на свае словы.

Але, усё роўна, дзякуй!

Віншую вызваленых ды іх блізкіх! А тым, хто яшчэ ў зняволенні за свае перакананні, зычу цярпення і волі! Трымайцеся, браты і сёстры!», — напісаў Мікалай Статкевіч.

Учора на свабоду выйшлі 25 чалавек. Пры тым што да гэтага выказвалася меркаванне пра большую колькасць вызваленых.

Выказвалася думка, што можа быць вызвалена сотня ці дзве сотні чалавек.

Так дарадца Святланы Ціханоўскай Франак Вячорка сказаў учора наступнае: «Не тая лічба, якая анансавалася, але, я думаю, гэта яшчэ не канец. Сам Джон Коўл тлумачыў, што ёсць пэўныя ўмовы з боку Менска, каб вызваліць людзей. І найбліжэйшыя дні, тыдні стане ясна больш. Магчыма, гэта звязана з умовамі Лукашэнкі пра разблакаванне фінансавых сродкаў, актываў. Можа быць звязана зь некаторымі санкцыйнымі прадпрыемствамі. Ясна, што Лукашэнка заўжды хоча пакінуць за сабой апошняе слова — памяняць спісы, не даць, што абяцаў».

Чытайце яшчэ

Каментары

Цяпер чытаюць

Выходзіць другая частка «Імёнаў Свабоды» Арлова

Новы ці ўжываны? Колькі каштуюць Geely і Belgee з прабегам і ці моцна яны гублялі ў цане