На паўночным захадзе Пакістана загінулі па меншай меры 17 чалавек, у тым ліку пяць паліцэйскіх, у выніку нападу смяротніка. Ён на замінаваным аўтамабілі ўрэзаўся ў будынак паліцэйскага ўчастка ў горадзе Кахат правінцыі Хайбер-Пахтунхва, паведамляе Бі-бі-сі.
Напад адбыўся падчас пятнічнай малітвы. Унутры будынка знаходзілася мячэць, дзе маліліся супрацоўнікі паліцыі, члены іх сем’яў і іншыя людзі. Пасля выбуху ўзброеныя людзі, якія суправаджалі смяротніка, адкрылі агонь. Паміж нападнікамі і паліцыяй адбылася перастрэлка. Аднаго з нападнікаў, які меў пояс з выбухоўкай, паліцэйскія застрэлілі.
Начальнік паліцыі правінцыі Зульфікар Хамід назваў тое, што адбылося, тэрактам, здзейсненым смяротнікам. Ніхто пакуль не ўзяў на сябе адказнасць за напад.
Прэзідэнт Пакістана Асіф Алі Зардары пажадаў хутчэйшага выздараўлення пацярпелым. Прэм’ер-міністр краіны Шахбаз Шарыф таксама асудзіў выбух.
У апошнія месяцы ў прымежных раёнах Пакістана прыкметна ўзрасла актыўнасць узброеных груповак, якія атакуюць вайскоўцаў і паліцыю. Улады Пакістана сцвярджаюць, што баевікі выкарыстоўваюць хованкі на тэрыторыі Афганістана для падрыхтоўкі і планавання нападаў. Афганскі рух Талібан, які прыйшоў да ўлады ў краіне, гэтыя абвінавачанні адмаўляе і заяўляе, што праблема дзейнасці баевікоў з’яўляецца ўнутранай справай Пакістана.
Цяпер чытаюць
З псіхбальніцы збег былы начальнік Ганцавіцкай міліцыі13
Каментары