Сустракаюцца ў розных частках прысталічнага раёна.
Дзе іх заўважалі і як паводзіць сябе пры сустрэчы з драпежнікам, распавёў smolevichi-24.by вядучы паляўніцтвазнаўца Смалявіцкай паляўнічай гаспадаркі Аляксандр Янчэўскі. Паводле слоў спецыяліста, цяпер на тэрыторыі Смалявіцкага раёна жыве каля 15 мядзведзяў.
Пры гэтым паляванне на гэтых жывёл забароненае — мядзведзь застаецца чырванакніжным відам.
Прысутнасць касалапых фіксавалі ў раёне Бабінага лесу, Тадуліна, каля палігона і Нацыянальнага аэрапорта Мінск, а таксама ў ваколіцах вёскі Шэметава і на Усяжскіх разлівах.
Жыхары Зялёнага Бору таксама перадавалі фатаграфіі мядзведзяў з фотапастак і відэа са слядамі жывёл у навакольных лясах.
Нядаўна аднаго з клышаногіх заўважылі ў полі на мяжы Азярыцка-Слабадскога і Усяжскага сельсаветаў. Фатаграфіяй з рэдакцыяй падзялілася мясцовая жыхарка.
На думку паляўніцтвазнаўца, больш частыя сустрэчы з мядзведзямі не абавязкова азначаюць, што жывёл стала больш.
Адна з прычын — людзі самі сталі больш актыўна хадзіць у лес. Акрамя таго, праз тэрыторыю раёна могуць праходзіць мігруючыя асобіны.
— У лесе шмат грыбнікоў, а мядзведзі баяцца людзей, вось і пераходзяць з месца на месца, — растлумачыў Аляксандр Янчэўскі.
Са слоў спецыяліста, пра сустрэчы з мядзведзямі часам расказваюць і паляўнічыя. Зараз адкрыты сезон палявання на дзікоў, ласёў, аленяў і казуль, таму людзі часцей бываюць у лесе.
Сам паляўніцтвазнаўца, які рэгулярна выязджае ноччу з цеплавізарам, пакуль асабіста мядзведзя не сустракаў.
Што рабіць, калі сустрэлі мядзведзя
- — не крычыце і не спрабуйце прагнаць звера;
- — не рабіце рэзкіх рухаў;
- — не набліжайцеся да жывёлы;
- — спакойна пачынайце адыходзіць у процілеглы бок;
- — дайце мядзведзю магчымасць сысці.
Галоўнае — не панікаваць і не спрабаваць самастойна прагнаць клышаногага. Жывёліна, як правіла, сама імкнецца пазбегнуць сустрэчы з чалавекам.
Каментары
І дарэчы, глупства, што людзі "больш сталі хадзіць у лес".
Наадварот, зараз людзі карыстаюць лес куды меньш, бо ўрбанізацыя і інтэнсіўная сельская гаспадарка дазваляе добра жыць, не карыстаючы лясныя рэсурсы. Яшчэ 100 гадоў таму нармальна было штодня туды хадзіць, і не гуляць, а па справе.
Плюс забота аб экалогіі, якая значна зменшыла цяжкія металы і іншыя летальныя рэчывы ў антрапагенных экасістэмах, прывяла да таго, што звяры жывуць бліжэй да людзей.
Таму мішкі і гуляюць свабодна - што людзі іх не палююць і значна меньш актыўнічаюць у лясах. Мішка смялее.