22 верасня ў другой палове дня на амерыканскай авіябазе Шпангдалем у нямецкім рэгіёне Эйфель разбіўся знішчальнік. Папярэдне паведамляецца, што пілот паспеў катапультавацца, піша Bild.
Аварыя адбылася каля 14:10 на тэрыторыі амерыканскай вайсковай базы. Паводле першай інфармацыі, самалёт упаў каля поля для гольфа ў межах ахоўнай зоны базы. На месца былі накіраваныя значныя сілы пажарнікаў і паліцыі.
Жыхары навакольных населеных пунктаў звярнулі ўвагу на вялікую чорную хмару дыму. Бургамістарка горада Шпайхер расказала, што бачыла, як знішчальнік хутка страціў вышыню, пасля чаго ў небе з'явіўся дым. Яна патэлефанавала ў экстранныя службы.
Нямецкія службы таксама атрымалі сігнал пра здарэнне. Прафесійная пажарная служба Трыра пацвердзіла, што спачатку яе накіравалі ў раён Шпангдалема, але пазней адклікалі, паколькі аварыя адбылася непасрэдна на тэрыторыі амерыканскай базы.
Паводле папярэдніх звестак, разбіўся амерыканскі F-16 Fighting Falcon. Самалёт, як мяркуецца, належаў 480‑й знішчальнай эскадрыллі 52‑га знішчальнага крыла, размешчанага на авіябазе Шпангдалем. Пілот змог катапультавацца. Інфармацыі пра яго стан і магчымых іншых пацярпелых пакуль няма.
Прычыны падзення самалёта пакуль невядомыя. Праводзіцца расследаванне.
Авіябаза Шпангдалем з'яўляецца адной з важных амерыканскіх вайсковых авіябаз у Еўропе, дзе, у прыватнасці, базуюцца знішчальнікі F-16. Чакаецца, што амерыканскія вайскоўцы паведамяць дадатковую інфармацыю пра здарэнне.
Каментары