«Лена, мяне, магчыма, сёння расстраляюць. Нашы». Жонка расіяніна распавяла, што адбываецца з тымі, хто адмаўляецца ваяваць
Алена Кашына, жонка мабілізаванага расіяніна, распавяла на стрыме The Insider, як яе муж адмовіўся забіваць і ў якіх умовах яго, як «адмоўніка», утрымліваюць. Жанчына баіцца за мужа, аднак пагадзілася назваць сваё імя і не хавае твару на відэа.
Па словах Кашынай, яе мужа змясцілі ў спецыяльны лагер для «адмоўнікаў». Раней было вядома пра некалькіх такіх месцаў у вёсках Луганскай вобласці — у Бранцы і Перавальску. Муж Алены з двума дзясяткамі такіх жа мабілізаваных знаходзіцца ў сяле Завітне Бажання ў Данецкай вобласці. У гэтым месцы для «адмоўнікаў» расійскіх мабілізаваных салдат трымаюць у «каменным мяшку склепа» ў жахлівых умовах.
Алена распавядае, што ў яе мужа няма ніякага баявога досведу. Калі ён служыў у арміі, «рамантаваў БТРы ў гаражы». У яго ваенным білеце, па яе словах, так і запісана: «Кіроўца па рамонце і эксплуатацыі цяжкай тэхнікі».
Алена распавядае, што пасля прызыву яе мужа павезлі на палігон. Там яны «з аўтамата адзін дзень пастралялі».
Па словах Алены, муж ёй распавядаў, што прыцэл аўтамата, які яму далі, быў дэфармаваны.
«Я паспрабаваў з 400 метраў — нікуды не трапіў, з 200 метраў — нікуды не трапіў, таксама і са 100 метраў. Як там можна трапіць — крывыя рулі», — распавядаў муж Алене.
«У другі дзень яны капалі акопы — вось і ўся баявая падрыхтоўка», — кажа жанчына.
Потым іх амаль адразу адправілі ва Украіну.
Калі ён выйшаў на сувязь, распавядаў, што «спрабуюць яны там адваёўваць лесапалосы», што ходзяць, нясуць вахты ў акопах, што калі ён выйшаў з аднаго акопа, «у яго заступілі двое хлопцаў, і іх забіла там».
12 кастрычніка ён патэлефанаваў і сказаў, што іх прымушаюць ісці на штурм варожых пазіцый.
«Ён кажа: я для сябе зразумеў, што я ніколі не змагу забіць чалавека. Як я пайду туды? Я заплюшчу вочы ці вушы рукамі, і мяне проста расстраляюць», — перадае словы мужа Алена.
12 чысла ён напісаў рапарт.
«А перад тым, як напісаць, зампаліт 5-й роты ў іх там у ДНР, дзе ён знаходзіцца, сказаў: «Калі вы, хлопцы, будзеце нешта пісаць, мы вас расстраляем і закінем у агульную яму. А сваякам напішам, што вы без вестак зніклыя. Ён мне патэлефанаваў і сказаў: «Лена, мяне, магчыма, сёння расстраляюць. Нашы ж расстраляюць».
Па словах Алены, «адмоўнікаў» забралі, закінулі ў склеп непадалёк ад перадавой. Было спачатку іх восем чалавек, цяпер ужо 21 чалавек.
«Цалкам маральна прыгнечаныя людзі, іх паламалі проста псіхічна, псіхалагічна. Такія жахі [ім] кажуць, што вы павінны ісці на перадавую, забіваць дзяцей нават, жанчын, усіх, хто трапіцца. Там проста будзе ісці зачыстка, вы павінны забіваць усіх», — распавяла Алена.
Юрась Зянковіч расказаў пра сваё вызваленне і шлях у ЗША6
Каментары