Студэнтак беларускіх ВНУ абавязалі тэрмінова запоўніць анкету з пазначэннем свайго росту
Анкетаванне праводзіцца Нацыянальнай школай прыгажосці, якая рыхтуе дзяўчат у тым ліку для службы пратакола Аляксандра Лукашэнкі. У студэнтак пытаюцца пра рост, сямейнае становішча, хобі, удзел у конкурсах прыгажосці і патрабуюць назваць акаўнты ў сацсетках. Пра тых, хто адмовіцца ад апытання, патрабуюць паведамляць асобна.
Як вынікае з паведамлення, разасланага ў ВНУ, студэнтак беларускіх ВНУ абавязваюць прайсці апытанне ў межах праекта «Партрэт беларускай жанчыны».
«Апытанне трэба правесці не пазней за 2 кастрычніка. То-бок да канца працоўнага дня 2 кастрычніка апытанне павінны прайсці усе дзяўчаты», — гаворыцца ў паведамленні.
Куратары кантралююць праходжанне апытання і складаюць спісы тых, хто яго прайшоў. Калі студэнтка адмаўляецца, пра гэта патрабуюць паведамляць з указаннем прычыны.
У самой анкеце ёсць пункт пра згоду на апрацоўку персанальных даных. Але гэтага недастаткова. Арганізатары патрабуюць сабраць з удзельніц яшчэ і асобныя пісьмовыя згоды. Іх формы і ўзоры запаўнення перадалі куратарам.
Апытаць усіх студэнтак ВНУ распарадзілася намесніца міністра адукацыі Кацярына Пятруцкая.
У анкеце просяць пазначыць імя, месца нараджэння і грамадзянства, дату нараджэння і ўзрост, сямейнае становішча і таксама, што звяртае ўвагу, рост.
Таксама трэба паведаміць звесткі пра адукацыю (навучальную ўстанову, спецыяльнасць, курс і форму навучання), валоданне замежнымі мовамі і дадатковую адукацыю.
Акрамя таго, дзяўчат пытаюцца пра хобі, удзел у конкурсах прыгажосці і талентаў. Таксама просяць пазначыць ключавыя дасягненні, узнагароды і прызавыя месцы ў вучобе, спорце і конкурсах. Анкета патрабуе і кантактныя даныя: нумар мабільнага тэлефона і спасылкі або нікі ў інстаграме, фэйсбуку, тэлеграме, «Укантакце», тыктоку, ютубе, расійскім шпіёнскім месенджары Mах ды іншых сацсетках.
У форме пазначана, што гэтыя звесткі збіраюцца для «фармавання партрэта сучаснай беларускай дзяўчыны» і будуць апрацоўвацца на працягу дванаццаці месяцаў.
«Давайце закрыем гэтае пытанне хутка і без нейкіх эксцэсаў», — патрабуюць куратары ўніверсітэцкіх груп.
«Наша Нiва» — бастыён беларушчыны
ПАДТРЫМАЦЬ
Малодшы сын Сахашчыка абвешчаны зніклым без вестак. Выглядае, ён ваяваў за Расію88
Каментары
рост, сямейнае становішча, хобі, акаўнты ў сацсетках.
А таксама якія у Кацярыны Пятруцкай ключавыя дасягненні, узнагароды.
Якія ў яе кантактныя даныя: нумар мабільнага тэлефона і спасылкі або нікі ў інстаграме, фэйсбуку, тэлеграме, «Укантакце», тыктоку, ютубе, месенджары Mакс ды іншых сацсетках.
Хто яе муж?