Hłuski śpič prezydenta — samy aryhinalny chod u historyi pieradvybarnych kampanij.
Źviartajučysia da miascovych žycharoŭ u Hłusku, lider nacyi pastaviŭ pytańnie rubam: «Chto pje kožny dzień — za mianie nie hałasujcie. Ja z takimi siabravać nia budu».
Z časoŭ Perykła historyja vybarnych demakratyj nia viedała nastolki suicydalnaha z punktu hledžańnia elektaralnych perspektyŭ kroku.
Adpaviedna lipieńskim źviestkam Instytutu sacyjalohii, 37% biełaruskich mužykoŭ štodnia močać džała. Inšymi słovami, havorka idzie jak minimum pra 20—25% patencyjnych vybarščykaŭ. I raptam palityk, u jakoha na nosie vybary, dobraachvotna admaŭlajecca ad ich hałasoŭ. Heta toje samaje, kali b Buš-małodšy zaklikaŭ janki: «Chto jeść hamburhiery, za mianie nie hałasujcie. Nahonicie tłušču, a prezydentu jaho potym zhaniaj».
Dziŭnaja taksama cana hłuskaha vybaru: abo plaška, abo siabroŭstva z prezydentam. Niaŭžo lubimy kiraŭnik siabruje z takoj kolkaściu ludziej, dy jašče vypivoch? Dziŭny ŭ takim razie ŭ ich farmat siabroŭskich pasiadziełak: usie kvasiać, a adzin u chakiej hulaje.
Mocna padstaviŭsia prezydent i ŭ inšaj halinie. Adpaviedna z aficyjnymi vynikami referendumu-2004, baćkaŭ kurs padtrymali niašmat vybarcaŭ. Pakolki 100 % alkanaŭtaŭ naŭrad ci admoviacca zaviazać dziela abstraktnaha siabroŭstva z prezydentam, to kolkaść nabranych apazycyjaj hałasoŭ u 2005 h. lahična pavinna vyraści. Kali ž vyniki, abvieščanyja Lidzijaj Jarmošynaj, hetaha nie paćvierdziać, vo budzie hrunt dla najezdaŭ zamiežnych nahladalnikaŭ na i tak zaciukany biełaruski Centravybarkam.
Adno z dvuch: abo hety palityk viedaje zahadzia, što pieramoža, abo viadzie cikavuju elektaralnuju kambinacyju. Pakolki vybary ŭ nas samyja sumlennyja i prazrystyja ŭ śviecie, zastajecca druhoje. Sapraŭdy, kali pryhledziecca, to krok baćki nie taki ŭžo idyjo… prabačcie, nielahičny.
Mahčyma, prezydent namahajecca spravakavać apazycyju na niasłušnyja dziejańni. Pavioŭšysia na harantavu mulku, narodnaja kaalicyja zrobić staŭku na vakantnuju praśpirtavanuju častku vybarščykaŭ i prainstruktuje «zubroŭ» zafihačyć usie ścieny hrafici: «Chočaš štodzień buchać — treba adzinaha vybirać!» Ot budzie padstava dla źjedlivych kamentaroŭ u prahramie «Ŭ centry ŭvahi».
Što da supiarečnaściaŭ aficyjnych vynikaŭ, taksama jość vyjście. Siaredniaja doza vypitaha zhadanymi 37%, zhodna z tymi ž źviestkami NAN, składaje 1,5 standartnaj butelki harełki. Jak bačym, biaź dźviuch chodak nijak nie abyścisia. Tak što sp-nia Jarmošyna, kamentujučy vysokuju ličbu padtrymki AHŁ, moža lohka paryravać usie paklopy «Viasny» i «Partnerstva»: adrasatami baćkavaha zakliku ŭ Hłusku była mienšaja častka ajčynnych ałkašoŭ. Absalutnaja bolšaść, jak śviedčyć statystyka, kirajuć nie adzin, a dva razy na dzień.
Kamientary