22 lutaha — Akute, Palina Respublika, «Adys Abieba» na premii Ultra-music

Uručeńnie premii Ultra-music.com adbudziecca 22 lutaha ŭ kłubie «Centr». U kancercie biaruć udzieł: Akute, Palina Respublika, «Adys Abieba», Plum Bum i Irdorath.

Napiaredadni karespandent NN sustreŭsia z redaktarami sajta Ultra-music.com, kab daviedacca, jak historyk-archivist Viačasłaŭ Radzivonaŭ i žurnalist Alaksandr Čarnucha svaimi siłami stvaryli muzyčny partał.

Viačasłaŭ Radzivonaŭ: Sajt isnuje ŭžo dziesiać hod, nasamreč — pieršyja siem hod heta byŭ moj ułasny błoh z recenzijami. Ja kaliści zachaplaŭsia rasiejskaj viersija časopisa NME, i mnie chaciełasia stvaryć niešta padobnaje. I try hady tamu błoh pieratvaryŭsia ŭ sajt — mnie tady napisaŭ Saša, my sustrelisia i vyrašyli raźvivać Ultra-Music. U listapadzie jak-niebudź adśviatkujem dziesiacihodździe. Zaraz heta bieź pierabolšańnia, samy papularny ŭ Biełarusi muzyčny sajt.

Alaksandr Čarnucha: U našaj krainie, muzyka ŭ zaniapadzie. Nizki ŭzrovień u taho, što hučyć na telebačańni, na bolšaści radyjostancyj. A cikavych hurtoŭ, nasamreč šmat, navat papularnych za miažoj i absalutna nieviadomych na radzimie. My imkniomsia ŭ dastupnaj formie prezientavać ich.

Ci mahčyma pry dapamozie sajta vyciahnuć andehraŭnd na pavierchniu?

AČ: Vielmi ciažka. My nie adziny resurs takoha kštałtu, ale tut patrebna kansalidacyja siarod muzykaŭ i žurnalistaŭ. Treba vyjści za ramki dźviuch z pałovaj tysiač ludziej, jakija cikaviacca muzykaj.

Sajt niekamiercyjny: kolki čałaviek u vas pracuje, čamu jany pahadzilisia pracavać biaspłatna?

VR: U nas niedzie dvaccać aŭtaraŭ, jakija pieryjadyčna pišuć na sajt. U asnoŭny čas jaho robim ja, Saša, Ženia Łahunoŭskaja. My štodnia niešta robim dla sajta. Astatnija pišuć čas ad času. U bolšaści vypadkaŭ, kali prosiš kahości zrabić materyjał, nichto nie admaŭlaje. Jany taksama lubiać biełaruskuju muzyku, na hetym usio trymajecca.

Jakija krytery isnujuć dla toj muzyki, što źjaŭlajecca na sajcie?

VR: Adzinaje abmiežavańnie — jakaść zapisu. My infarmacyjnaje vydańnie, musim pakazvać roznuju muzyku, a nie tolki tuju, jakaja padabajecca nam. My nie dajom acenak — prosta prezientujem. Tyja, kaho my zaprasili vystupić na premii, heta častka našych favarytaŭ: kab paklikali ŭsich, daviałosia b rabić dvuchdzionny fiestyval.

AČ: U nas, na žal z kantekstu, vypadaje elektronnaja i rep-muzyka. Mahčyma, hetych muzykaŭ nie vielmi cikavić naš sajt, ale tut treba jašče kab u našaj redakcyi byŭ chto-niebudź, chto b viedaŭ, dzie takuju muzyku šukać. A nakont abmiežavańniaŭ — treš z sutareńniaŭ my naŭrad ci budziem stavić.

Vychodzić za biełaruskija miežy nie źbirajeciesia?

AČ: Kali našy karespandenty vyjazdžajuć u inšyja krainy, jany pišuć pra zamiežža. U nas byŭ vydatny artykuł pra muzyku Barsiełony ŭ troch častkach. Ci jość rubryka «Prabieł» Siarhieja Kačahara: jon piša pra muzyku Konha i inšych afrykanskich krain. Čytajuć słaba, ale heta, vidać, samaje cikavaje na našym sajcie — u runecie infarmacyi pra hetuju muzyku amal niama, a aŭtar raźbirajecca va ŭsim, što adbyvajecca ad Konha da Mali, ad Namibii da Svazilenda.

A jakija samyja vialikija pośpiechi ŭ historyi sajta?

AČ: My imkniemsia rabić cikavyja rubryki, ale napaŭniajucca jany nierehularna. Naprykład, «Chatniaje zadańnie» — kali našyja žurnalisty chodziać u hości da muzykaŭ. Ludziam cikaviej pahladzieć, jak hety samy muzyka žyvie. Ci rubryka «Nie maja sprava» — kali ludzi, jakija nijakaha dačynieńnia da muzyki nie majuć, razvažajuć pra jaje. Ci voś siońnia premjera rubryki «Prasłuška» — my źviartajemsia da ludziej samych roznych prafiesij, kab jany praanalizavali toj ci inšy albom. Z zachavańniem arfahrafii i punktuacyi. I viedajecie, atrymlivajecca cikaviej, čym kali toje samaje robiać prafiesijanały.

A nie było žadańnia stać na «kamiercyjnyja rejki»?

VR: My vielmi chočam, kab heta prynosiła hrošy, kab vyjści na nastupny, prafiesijny ŭzrovień. Ale pakul heta ciažka. Naturalna, treba kab prajekt byŭ cikavy rekłamadaŭcam. Čaho ŭ nas nikoli nie budzie, dyk heta artykułaŭ na zamovu — heta razburalna i dla žurnalistyki, i dla muzyki. A voś banerami my cikavimsia. Arhanizatary kancertaŭ jašče nie hatovyja tracić hrošy na takuju rekłamu. U hetaj śfiery nie krucicca vialikich hrošaj.

AČ: U nas, kali sprava dachodzić da hrošaj, adrazu vočy pa piać kapiejek: nie majem my kamiercyjnaj chvatki. Dy i jurydyčna my pakul nie majem mahčymaści vieści kamiercyjnuju dziejnaść.

Ale pry hetym zasnoŭvajecca muzyčnaja premija…

VR: Jana apłačvajecca z ułasnaj kišeni. Sponsaraŭ my nie znajšli, chacia rekłama była b niadrennaja, tamu praciahvajem rabić premiju za svoj košt.

AČ: Letaś, naprykład, hrošy «nie adbilisia» — bo ŭ paraŭnańni z papiarednimi hadami pavialičyŭsia maštab premii. I času vielmi nie chapaje — u nas va ŭsich jość stałaja praca, a premija stvarajecca ŭ volny čas. Ale admaŭlacca ad jaje my nie chočam, bo heta ŭžo stała tradycyjaj.

• 0
• 0
• 0
• 0
• 0
• 0
• 0
• 0