Stary spektakl z novaj butaforyjaj
Partyja Nazarbajeva "Nur Atan" nabrała 88% hałasoŭ. Nivodnaja inšaja nie pierasiahnuła 7-adsotkavy barjer. Pseŭdademakratyčny anturaž nie pieraškadžaje ŭmacoŭvać aŭtarytaryzm. Tak moža być i ŭ nas. Piša ŭ svaim błohu Alaksandar Kłaskoŭski.
Siońnia abvieščany papiarednija vyniki parlamenckich vybaraŭ u Kazachstanie. Jany ŭpieršyniu ładzilisia pa praparcyjnaj systemie — pavodle partyjnych śpisaŭ. "Elehantnuju pieramohu" atrymała prezydenckaja partyja "Nur Atan" — 88% hałasoŭ.
Nivodnaja inšaja partyja nia zdoleła pierasiahnuć 7-adsotkavy barjer. To bok apazycyi ŭ ichnim mažylisie nie dazvolili prysutničać navat symbalična.
Kali ŭ Biełarusi niekalki miesiacaŭ tamu pačali borździeńka lapić struktury "Biełaje Rusi", palityzavanaja publika zahamaniła, što i ŭ nas mohuć zładzić vybary pavodle partyjnych śpisaŭ. Ale heta nie padstava dla eŭfaryi. Kazaski prykład jaskrava śviedčyć: kali ŭsio schoplena, pseŭdademakratyčnaja butaforyja nie pieraškadžaje zachoŭvać i navat ŭmacoŭvać aŭtarytaryzm. Nazarbajeŭ pad markaj demakratyčnych reformaŭ, jak viadoma, aformiŭ dla siabie mahčymaść pažyćciovaha prezydenctva.
Mahčyma, kaho-kolviek u Miensku biare zajzdraść. Astana sprytna puskaje pył u vočy Zachadu. U pryvatnaści, z prycełam na staršynioŭstva ŭ ABSE. Dyj fakt toje, što Nazarbajeŭ nia maje prablemaŭ ź vizami ŭ raźvityja demakratyi.
Ź inšaha boku, centar Eŭropy — heta vam nie Centralnaja Azija. Biełaruskaje hramadztva, jak ni truščać tut parastki hramadzianskaje supolnaści, usio ž značna bolej saśpieła dla pieraŭtvareńniaŭ. Chto viedaje, mo' i hameapatyčnyja dozy liberalizacyi katalizujuć niepažadanyja dla ŭładaŭ pracesy? Badaj, mienavita tamu kiroŭnyja viarchi bajacca chaj sabie kasmetyčna, dziela bliziru, pierarablać vybarčaje zakanadaŭstva. I ŭvohule iści na najmienšyja sastupki što da demakratyzacyi. Navat adpaviednaja leksyka, musić, ličycca tabujavanaj:), u toj čas jak kazaski pravadyr lubić parazvažać pra palityčnyja reformy da raźvićcio pluralizmu.
Zaŭvažcie: u Miensku paličyli za lepšaje stracić preferencyi Eŭraźviazu, čym dać trochi voli prafźviazam. Bo pałochaje pryvid polskaj "Salidarnaści". I słuchać nia chočuć pra liberalizacyju medyjnaj palityki — naadvarot, majuć namier zakrucić šruby ŭ internecie. Dyj partyjaŭ da nastupnych vybaraŭ, peŭna, pamienieje. Tak što kali i vyrašać puścić Eŭropie pył u vočy vybarami "a-la Nazarbajeŭ", dyk elektarat u śpisach nie zabłytajecca:)
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary