25 maja ŭ Minsku vystupić The Australian Pink Floyd Show — kavier-kamanda, jakaja adzin u adzin uvasablaje na scenie lehiendarny hurt: pa hučańni ad naturalnaha «Fłojda» aŭstralijcaŭ možna i nie adroźnić, a vizualny šerah adzin u adzin paŭtaraje lehiendarnyja šou Uotersa i kampanii.
Padavałasia b, kavier-hurt i kavier-hurt. Kolki da nas takich užo jeździła? I The Beatles štuki čatyry roznyja, i The Animals u składzie nieviadoma kaho. Čamu takaja ŭvaha nadajecca Pink Floyd Show? Raźbiaremsia pa punktach.
Pa-pieršaje, aŭstralijcy majuć licenziju na vykanańnie pieśniaŭ «Fłojd». Ich asabista vielmi lubić Devid Hiłmar, jaki zaprašaje «Šoŭ» na ŭsialakija svaje siamiejnyja i nie vielmi siamiejnyja śviaty.
Pa-druhoje, naturalny Pink Floyd my nikoli nie ŭbačym — pakul Devid Hiłmar i Rodžer Uoters vyrašali, ci zmohuć jany tryvać adzin adnoha, pamior Ryk Rajt, a bieź jaho Pink Floyd niemahčymy.
Pa-treciaje, i Uoters i Hiłmar vandrujuć pa śviecie z kancertami, adnak nivodny ź ich nie moža być stoadsotkava jak Pink Floyd. Ź inšaha boku, Rodžer Uoters zaraz prakaciŭ pa śviecie poŭny albom The Wall, sabraŭšy anšłah na kožnym kancercie. Tym nie mienš, u Biełaruś Uoters naŭrad ci dajedzie ŭ bližejšyja niekalki hadoŭ.
Treba ŭličyć, što The Australian Pink Floyd Show heta ŭsio ž taki nie tyja samyja Pink Floyd — adnak jak patłumačyŭ aŭtaru adzin niamiecki amatar «Fłojd»: «Ja b schadziŭ na ich jašče raz, pry tym, što ŭžo maju kvitki na bližejšaha Uotersa i płanuju adpravicca na Hiłmara. Ale, što samaje dziŭnaje, na aryhinalny „Fłojd“ hetaje šou padobna najbolš».
Kamientary