Vice-prezident ZŠA Džej Dzi Vens prykmietna schudnieŭ paśla taho, jak pierajšoŭ na dyjetu z kvašanaj kapustaj i fiermientavanaj harodninaj. Hetym ža racyjonam zachapilisia i inšyja paplečniki Donalda Trampa. Naprykład, ministr achovy zdaroŭja Robiert Kienedzi-małodšy śćviardžaje, što za pieršy miesiac takoha charčavańnia straciŭ kala 9 kiłahramaŭ. Chto staić za novaj modaj u amierykanskaj administracyi i ci zachapiła jana Trampa, raskazvaje The Wall Street Journal.
Idejnym natchnialnikam novaj dyjety staŭ doktar Šon O'Mara. Jaho papularnaść siarod palitykaŭ nie vypadkovaja: O'Mara pačaŭ pracavać z palityčnaj elitaj jašče ŭ časy prezidenctva Džordža Buša-małodšaha, kali ŭvachodziŭ u hrupu miedykaŭ, jakija absłuhoŭvali Bieły dom.
Siońnia doktar viadzie pryvatnuju praktyku i śpiecyjalizujecca na kompleksnych MRT-daśledavańniach arhanizma. Heta dazvalaje dakładna vyjavić viscaralny tłušč — toj, što nazapašvajecca vakoł unutranych orhanaŭ i pravakuje ryzyku raźvićcia dyjabietu druhoha typu, sardečna-sasudzistych zachvorvańniaŭ i mietabaličnaha sindromu.
Sutnaść dyjety davoli prostaja: fiermientavanyja pradukty, pieradusim kvašanaja kapusta i kimčy, a taksama miasa žyvioł, jakija charčavalisia travoj. Pry hetym nieabchodna admovicca ad ałkaholu i praduktaŭ z vysokim utrymańniem cukru. Dla pierakusaŭ O'Mara rekamienduje tak zvanyja «staryja jeŭrapiejskija syry» — błakitny syr, harhanzołu abo parmiezan.
Pavodle pierakanańnia O'Mary, mienavita taki racyjon spryjaje pamianšeńniu niebiaśpiečnych tłuščavych adkładaŭ i azdaraŭleńniu mikrabijomu kišačnika. Jak piša WSJ, doktar asabliva lubić pracavać z pacyjentami stałaha vieku, bo ličyć, što ŭ ich vyniki takich źmienaŭ najbolš prykmietnyja.
Pieršym siarod čynoŭnikaŭ na novuju dyjetu kala hoda tamu pierajšoŭ 72‑hadovy Robiert F. Kienedzi-małodšy. Jon zajaŭlaje, što za pieršyja 30 dzion straciŭ prykładna 9 kiłahram. Pavodle słovaŭ Kienedzi, źmianieńnie charčavańnia dapamahło nie tolki schudnieć, ale i pazbavicca ad bolaŭ u ciele, a taksama spynić prystupy fibrylacyi pieradserdziaŭ, na jakija jon pakutavaŭ raniej.
Pry hetym, jak zaŭvažaje WSJ, sam smak kvašanaj kapusty Kienedzi nie zaŭsiody daspadoby. Tym nie mienš jon stavicca da dyjety nastolki surjozna, što pastajanna vozić z saboj zapasy fiermientavanaj harodniny.
Jaho žonka, aktrysa Šerył Chajns, raskazvała, što muž pračynajecca ŭ 6:30 ranicy, kab pryhatavać sabie stejk i źjeści porcyju kvašanaj kapusty. Adnojčy jon navat paprasiŭ pakłaści pakiet z kapustaj u jaje darahuju dyzajnierskuju sumačku pierad vychadam u śviet, ale atrymaŭ kateharyčnuju admovu.
41‑hadovy Džej Dzi Vens pryniaŭ novyja praviły charčavańnia padčas minułaha Vialikaha postu i prytrymlivajecca ich dahetul. Jak adznačaje WSJ, karystalniki sacyjalnych sietak užo zaŭvažyli, što vice-prezident staŭ vyhladać značna bolš strojnym.
Jaho typovy racyjon składajecca ź jajek, kvašanaj kapusty, salonych ahurkoŭ, jahad (maliny i ažyny), a taksama jałavičyny ci jahniaciny. Navat kali Vens zamaŭlaje hamburhier, jon zvyčajna jeść jaho biez bułki, dadajučy zamiest jaje fiermientavanuju harodninu.
Da hrupy prychilnikaŭ dyjety dałučylisia taksama 64‑hadovy ministr handlu Hovard Łutnik i 54‑hadovy ministr transpartu Šon Dafi. Łutnik doŭhi čas paźbiahaŭ čyrvonaha miasa, bo bajaŭsia ryzyki ankałahičnych zachvorvańniaŭ, ale paśla razmovy z Kienedzi źmianiŭ svaje pohlady. Jon taksama admoviŭsia ad dyjetyčnaj koły, zamianiŭšy jaje chałodnaj čornaj kavaj. Akramia taho, pavodle WSJ, Łutnik pačaŭ samastojna fiermientavać harodninu doma zamiest taho, kab kuplać hatovuju kvašanuju kapustu.
Jašče adnym paśladoŭnikam O'Mary staŭ były śpikier Pałaty pradstaŭnikoŭ Kievin Makarci. Jon uspaminaŭ, što źviarnuŭ uvahu na niezvyčajna dobry vyhlad skury Šona Dafi, paśla čaho toj paraiŭ jamu źviarnucca da śpiecyjalista. Makarci ŭspaminaje, što doktar nazvaŭ jaho stan «najhoršym vypadkam» u svajoj praktycy, ale zapeŭniŭ u vialikim patencyjale. U vyniku Makarci ŭžo straciŭ bolš za 10 santymietraŭ u talii.
Pasłuhi doktara O'Mary kaštujuć niatanna. Zhodna ź infarmacyjaj na jaho sajcie, bazavyja prahramy «aptymizacyi zdaroŭja» pačynajucca ad 8 tysiač dołaraŭ, a piersanalnaja kansultacyja abydziecca ŭ 18 tysiač.
Za hetyja hrošy doktar moža navat supravadžać klijenta ŭ pachodzie pa kramach, navučajučy vybirać karysnyja pradukty. Naprykład, jon raić brać fiermientavanuju harodninu z hłybini palic chaładzilnika, kudy nie traplaje śviatło, zdolnaje razburyć žyvyja mikraarhanizmy.
Sam Donald Tramp pakul zastajecca ŭ baku ad hetaha azdaraŭlenčaha ruchu. Jak piša WSJ, prezident ZŠA pa-raniejšamu addaje pieravahu picy, bulbie fry, dyjetyčnaj kole i dobra prasmažanym stejkam z kietčupam.
Tym nie mienš upłyŭ «kapustnaj dyjety» ŭžo vyjšaŭ za miežy pryvatnych zachapleńniaŭ. Jak adznačaje aŭtar, u novych dziaržaŭnych dyjetyčnych rekamiendacyjach, pradstaŭlenych Robiertam Kienedzi-małodšym i ministram sielskaj haspadarki Bruk Rolins letaś, upieršyniu źjaviłasia aficyjnaja rekamiendacyja ŭžyvać fiermientavanyja pradukty, u tym liku kvašanuju kapustu.
Kamientary
Chto tam bližej da Trampa? padkažycie jamu, što ŭ "Litoŭskaj haspadyni" jość cudoŭny recept !