Pieršaja biełaruskaja azbuka dla IOS užo ŭ siecivie

Dastupnaja dla spampoŭvańnia ŭ APP STORE pieršaja biełaruskaja azbuka dla płatformy IOS.

Dadatak byŭ stvorany supolna kamandami hramadskaj kulturnickaj kampanii «Budźma biełarusami!» i vydaviectva Kinderfox pad kiraŭnictvam aŭtara idei Andreja Załatara. Bukvar «Rodnaja azbuka» źjaŭlajecca pieršaj biełaruskaj azbukaj dla IPAD, jon adaptavany dla ŭsich hadžetaŭ liniejki IPAD.

Kamientuje kaardynatar kampanii «Budźma biełarusami!» i kiraŭnik MHA «ZBS «Baćkaŭščyna» Alena Makoŭskaja: «Biełaruskaja mova, jak lubaja inšaja sučasnaja mova, uvieś čas maje adkazvać na vykliki industryjalnaha hramadstva, być sučasnaj nie tolki na papiery i ŭ hučnych zaklikach. Mienavita tamu dla realizacyi takoha prajekta byŭ vybrany samy trendavy devajs. Pytańnie adukacyi na rodnaj movie staić u Biełarusi vostra, ale jašče vastrejšaje jano dla siemjaŭ biełaruskich emihrantaŭ. Ciapier žychary mietrapolii i dyjaspar atrymali dobry dapamožnik dla navučańnia svaich dzietak, źmiest jakoha adpaviadaje pamknieńniam baćkoŭ, a forma — patrebam dziaciej».

Stvorany z vykarystańniem prafiesijnaj interaktyŭnaj animacyi dadatak maje niekalki piersanažaŭ na vybar. Admysłova dla ich bukvar byŭ ahučany prafiesijnymi akciorami, Hannaj Chitryk i Paŭłam Charłančukom, jakija pračytali litary biełaruskaha ałfavitu, a taksama prostyja vieršy, jakija dapamohuć ich zapomnić. Kab zachavać uspryniaćcie movy jak siamiejnaj, jość mahčymaść zapisać hołas baćkoŭ. Muzyku dla prajekta napisaŭ i vykanaŭ lidar hurtu «Pałac» Aleh Chamienka, aŭtar vieršaŭ — Kastuś Sieviaryniec.

Kiraŭnik hrupy raspracoŭščykaŭ Andrej Załatar dapaŭniaje kalehu pa prajekcie: «Istotnym i važnym dla nas było znajści partniora, jaki b dapamoh kreatyŭna i arhanizacyjna ŭ stvareńni azbuki, i my rady, jak chutka ŭ vyniku spracavała kamanda i jakim atrymaŭsia pradukt. Jość vialikaje spadziavańnie, što znojducca i prahramisty, jakija zmohuć adaptavać taki važny dadatak i dla Android, bo Ipad karystajucca daloka nie ŭsie. Niečakana dla nas samich pradukt chutčej, čym zvyčajna, atrymaŭ approve ad Applestore — dumaju, heta dobry znak. Dobry znak dla rodnaj movy i dla nas usich».

Kamanda Andreja Załatara nie tak daŭno pradstaviła biaspłatny dadatak pra histaryčnuju spadčynu Biełarusi «Biełaruś HD: Unikalnyja fotazdymki i 360 panaramy najlepšych miaścinaŭ Biełarusi». Hramadskaja kampanija «Budźma biełarusami!» z 2008 hoda zajmajecca padtrymkaj kulturnickich inicyjatyvaŭ, skiravanych na ŭzmacnieńnie samaidentyfikacyi biełarusaŭ, siarod jakich — kamunikacyjnaja prahrama «Kraina Cmokaŭ», adnajmiennaja animacyja «Budźma biełarusami!», štohadovy Fiestyval biełaruskaj rekłamy «Ad.nak!» i inšyja.

U płanach raspracoŭščykaŭ — pošuk partnioraŭ dla stvareńnia Android-viersii dadatku i realizacyja sieryi kazak u formie dadatkaŭ na płatformie IOS.

Sajt prajekta — bukvar.by

Spasyłka dla spampoŭki — https://itunes.apple.com/ru/app/abc-belarus-native-alphabet/id661715021?mt=8.

• 0
• 0
• 0
• 0
• 0
• 0
• 0
• 0