20 listapada ŭ Miensku prajšła prezentacyja pieršaha biełaruskamoŭnaha albomu hurtu «J:mors» «Adlehłaść».
U dysk uvajšło 11 piesień, siarod jakich — try pieśni pa-biełarusku z papiarednich albomaŭ («Žyvi», «Tak‑ci‑tak», «Pavietra»), dva pierakłady kampazicyj z ruskaj movy («Majo sonca», «Hladzi») i šeść novych zapisaŭ. Aŭtary ŭsich kampazicyj, akramia adnoj narodnaj pieśni «Viarba», — udzielniki hurtu Uładzimir Puhač i Raman Arłoŭ.
Jak paviedamiŭ na pres‑kanfierencyi lider hurtu Uładzimir Puhač, ideja zapisać biełaruskamoŭny albom źjaviłasia ŭ kalektyvu try hady tamu, paśla zvarotaŭ nakont hetaha hledačoŭ na kancertach. Pavodle jaho słoŭ, u asnovie hetaha alboma «lažyć takaja ž patreba ŭ samarealizacyi, jak i ŭ vypadku z astatnimi albomami». U toj ža čas jon zaŭvažyŭ, što adzin z matyvaŭ vypusku takoha dyska — «dakazać sabie i inšym, što biełaruskamoŭnaja muzyka taksama moža być papularnaj» i «pavinna hučać na radyjo». Pavodle słoŭ U.Puhača, nieabchodna razburyć «dychatamiju, kali mejnstrymavyja vykanaŭcy śpiavajuć u asnoŭnym na ruskaj, a alternatyŭnyja — na biełaruskaj movie».
Na vypuščanym dysku «J:mors» pradstaŭleny taksama novy prajekt kalektyvu — film «Adlehłaść: Padarožža pa Biełarusi». Prajekt ujaŭlaje saboj 15‑chvilinnuju videazamaloŭku ab pomnikach biełaruskaj architektury, raźmieščanych u roznych miescach Biełarusi pieravažna niepadalok ad miažy. Film źniaty ŭdzielnikami hurtu na zvyčajny 10‑miehapiksielny ličbavy aparat i zmantavany nie ź videamateryjałaŭ, a bolš čym z 20 tys. fotazdymkaŭ z vykarystańniem technałohii «time laps». Techničnuju častku prajekta realizavaŭ biełaruski miedyjamastak Andrej Savicki.
«Usie viedajuć Mir, Niaśviž, Chatyń — i ŭsio. A ŭ Biełarusi kala tysiačy pomnikaŭ architektury, jakimi možna lubavacca», — zaŭvažyŭ U.Puhač. Pavodle słoŭ A.Savickaha, materyjał, ź jakoha stvorany film, jaki maje farmat vystavačnaj ekspazicyi. «My byli b rady, kali b prajekt staŭ asnovaj vystavy ŭ krajaznaŭčym muziei», — skazaŭ jon.
Kancertnaja prezientacyja novaha alboma «J:mors» i filma, źniataha kalektyvam, projdzie ŭ Minsku 2 śniežnia.
Kamientary