«Mnie zdajecca, heta kryminalny artykuł». Pinčuk aburyŭsia stanam novaj darohi ŭ horadzie
Žychary Pinska paskardzilisia na stan darohi kala handlovaha centra. Jamy i raskoliny źjavilisia ŭsiaho praz hod paśla ramontu, piša BGmedia.
Žychar horada zapisaŭ videarolik, u jakim emacyjna vykazaŭsia pra stan novaj darohi kala handlovaha centra. Pavodle jaho słoŭ, pakryćcio ŭsiaho za hod pryjšło ŭ taki stan, što «pa im prosta niemahčyma jechać».
«Ja, viadoma, dzika prašu prabačeńnia, ale jak daroha kala handlovaha centra, usim viadomaha i ŭsimi lubimaha ŭ horadzie Pinsku, za adzin hod pieratvaryłasia voś u taki stan, pa jakoj prosta niemahčyma jechać. Heta ž jak jaje treba było rabić i z čaho? I čamu nichto zaraz nie biažyć, nie ratuje jaje, nie ramantuje? Mnie zdajecca, heta kryminalny artykuł, nie? Jak vy dumajecie? Ja nie viedaju».
Pavodle słoŭ mužčyny, havorka idzie pra darohu, jakaja jašče niadaŭna ličyłasia novaj. Ciapier ža — jamy, raskoliny i niaroŭnaści.
Asabliva prablemnym kiroŭcy nazyvajuć pavarot naprava: tam, jak pišuć u kamientarach, «kankretnaja jama, i dalej mietraŭ 50 — zubadrabiłka».
Pad videa chutka źjavilisia dziasiatki kamientaroŭ.
Mnohija śćviardžajuć, što prablema nie łakalnaja.
«Dy ŭ Pinsku pa ŭsim horadzie tak».
«U Pinsku ad daroh tolki nazva».
«Asfalt syšoŭ razam sa śnieham».
«Zhodny, treba ŭžo sadžać za takuju jakaść. Čamu niama nahladu?»
«Heta pałasa pieraškod ź niezrazumiełaj raźmietkaj».
Niekatoryja dzielacca asabistym vopytam. Adzin z kiroŭcaŭ piša, što «ŭčora vyjaviŭ, što dva koły ŭhrobiŭ, prosta stali kryvyja, dalej horada nikudy nie jeździŭ».
Inšy dadaje: «Jechaŭ tam — i sam byŭ u šoku. Za hod — i ŭsio, kapiec darozie».
Častka kamientataraŭ ličyć, što sprava ŭ parušeńni technałohii budaŭnictva.
Ludzi iranizujuć: «Vyrašyli sekanomić na bietonie, ale niešta pajšło nie tak», «Technałohija, hałoŭnaje — była vykananaja rabota i spravazdača».
Inšyja vinavaciać zimu i reahienty. Na dumku adnaho z karystalnikaŭ, bieton «zabivaje sol, jakoj pasypajuć darohu».
Nie abyšłosia i biez sarkazmu: «U Pinsku darohi robiać tolki ŭ žachlivych umovach nadvorja, kali doždž idzie». «Zatoje ŭsie drevy spraŭna śpiłavali ŭ tym rajonie».
Žychary horada ŭsio čaściej kažuć pra toje, što stan daroh u Pinsku — chraničnaja tema.
«U kaho ni spytaju pra Pinsk, usie kažuć: što heta za darohi ŭ vas?» — piša adzin z kamientataraŭ.
Kamientary