Kab zabić Chamieniei, izrailskaja raźviedka ŭzłamała darožnyja kamiery ŭ Tehieranie i adklučyła vyški mabilnaj suviazi
«Masad» niekalki hadoŭ sačyŭ za vysokapastaŭlenymi iranskimi čynoŭnikami, uzłamaŭšy amal usie kamiery videanazirańnia ŭ Tehieranie. Z padrabiaznaściami apieracyi, jakaja pryviała da hibieli viarchoŭnaha lidara Irana Ali Chamieniei znajomić Financial Times.
Jak nahadvaje Financial Times, Iran staŭ pryjarytetnaj cellu dla Izraila jašče ŭ 2001 hodzie pa zahadzie tahačasnaha premjer-ministra krainy Aryela Šarona. Z toj pary krainy viali niaspynnuju tajnuju vajnu. Izrail pravodziŭ apieracyi suprać iranskaj jadziernaj prahramy, zabivaŭ navukoŭcaŭ i vajskoŭcaŭ, dziejničaŭ suprać iranskich sajuźnikaŭ u rehijonie. Iran u adkaz uzłamvaŭ kamiery ŭ Ijerusalimie, telefony svajakoŭ izrailskich siłavikoŭ i navat padkuplaŭ hramadzian Izraila dla zboru źviestak.
Adnak paśla napadu CHAMAS 7 kastryčnika 2023 hoda Izrail źmianiŭ svaju stratehiju. Kali raniej zabojstva kiraŭnikoŭ dziaržaŭ ličyłasia tabu, to ciapier izrailskaje kiraŭnictva pierajšło da bolš ahresiŭnych dziejańniaŭ.
Jak adznačyła byłaja supracoŭnica «Masada» Sima Šajn, paśla paśpiachovych apieracyj ź piejdžarami «Chiezbały» i zabojstva Ismaiła Chanii ŭ izrailskich śpiecsłužbaŭ razhareŭsia apietyt, što ŭ vyniku i pryviało da ŭdaru pa samim ajatale Chamieniei.
Technałohii na słužbie raźviedki
Pavodle FT, izrailcianie hadami sačyli za tym, jak ciełaachoŭniki i kiroŭcy iranskich čynoŭnikaŭ prybyvajuć u rajon vulicy Pastera ŭ Tehieranie. Mienavita ŭ hetym kompleksie ŭ subotu, 28 lutaha, byŭ zabity 86‑hadovy Ali Chamieniei.
Jak paviedamili vydańniu dźvie krynicy, znajomyja z apieracyjaj, amal usie darožnyja kamiery ŭ Tehieranie na praciahu niekalkich hadoŭ byli ŭzłamanyja, a zašyfravanyja vyjavy ź ich pieradavalisia na sierviery ŭ Tel-Avivie i na poŭdni Izraila.
Adnak adna z kamier mieła asabliva ŭdały rakurs: jana dazvalała vyznačyć, dzie supracoŭniki achovy lubili parkavać svaje asabistyja aŭtamabili, i adkryła mahčymaść nazirać za paŭsiadzionnym žyćciom hetaha zakrytaha abjekta pad uzmocnienaj achovaj.
Składanyja ałharytmy apracoŭki infarmacyi dapaŭniali daśje na supracoŭnikaŭ słužby biaśpieki takimi detalami, jak adrasy pražyvańnia, hrafik dziažurstvaŭ, maršruty na pracu i, što samaje važnaje, kaho mienavita jany zvyčajna supravadžali i pieravozili. Takim čynam vybudoŭvałasia toje, što raźviedčyki nazyvajuć «madellu ładu žyćcia».
Hetyja mahčymaści byli častkaj šmathadovaj raźviedvalnaj kampanii, jakaja padrychtavała hlebu dla zabojstva ajatały. Krynica apieratyŭnych danych u režymie realnaha času — adna z sotniaŭ roznych płyniaŭ raźviedvalnaj infarmacyi — była nie adzinym sposabam, z dapamohaj jakoha Izrail i CRU zmahli dakładna vyznačyć, u jaki čas Chamieniei budzie znachodzicca ŭ svaim ofisie ranicaj u subotu i chto budzie razam ź im.
Jak adznačaje vydańnie, Izrail taksama zdoleŭ parušyć pracu asobnych kampanientaŭ prykładna dziasiatka mabilnych vyšak suviazi kala vulicy Pastera. U vyniku pry sprobie vykliku telefony padavałasia zaniatymi, što nie dazvoliła achovie Chamieniei atrymać mahčymyja papiaredžańni.
«My viedali Tehieran hetak ža dobra, jak Ijerusalim. A kali ty viedaješ miesca hetak ža dobra, jak vulicu, na jakoj vyras, ty zaŭvažaješ lubuju drobiaź, jakaja znachodzicca nie na svaim miescy», — cytuje FT dziejnaha izrailskaha supracoŭnika raźviedki.
Detalovaja raźviedvalnaja karcina stalicy Irana stała vynikam karpatlivaha zboru dadzienych. U im udzielničali izrailskaje padraździaleńnie radyjoelektronnaj raźviedki «Unit 8200», ahienturnaja sietka «Masada» i vajennaja raźviedka, jakaja štodnia apracoŭvała masivy infarmacyi.
Izrail vykarystoŭvaŭ matematyčny mietad analizu sacyjalnych sietak, kab apracoŭvać miljardy adzinak infarmacyi. Heta dazvalała vyjaŭlać niečakanyja centry pryniaćcia rašeńniaŭ i vyznačać novyja mety dla nazirańnia i likvidacyi. Usio heta siłkavała svojeasablivy kanviejer, na vychadzie jakoha byŭ adziny pradukt — mišeni.
«Kali palityčny kiraŭnik vyrašaje, što kahości treba likvidavać, kultura ŭ Izraili takaja: «My zabiaśpiečym raźviedku celaŭ», — pryvodzić FT słovy bryhadnaha hienierała reziervu z 25‑hadovym stažam pracy ŭ raźviedcy Itaja Šapiry.
Fatalnaja subota na vulicy Pastera
Pavodle źviestak FT, rašeńnie ab likvidacyi Chamieniei było palityčnym. Krynica, prainfarmavanaja ab situacyi, paviedamiła, što napad na Iran płanavaŭsia miesiacami, ale čynoŭniki skarektavali apieracyju paśla taho, jak amierykanskaja i izrailskaja raźviedki paćvierdzili, što Chamieniei i jaho vysokapastaŭlenyja paplečniki sustrenucca ŭ rezidencyi ŭ Tehieranie ŭ subotu ranicaj.
Mahčymaść zabić jaho razam ź vialikaj častkaj iranskaha kiraŭnictva paličyli asabliva vyhadnaj. Paśla pačatku poŭnamaštabnaj vajny zrabić heta było b značna składaniej: irancy chutka pierajšli b u padziemnyja bunkiery, niedasiažnyja dla izrailskich bombaŭ.
Jak adznačaje FT, Chamieniei, u adroźnieńnie ad svajho sajuźnika, lidara «Chiezbały» Chasana Nasrały, nie žyŭ u padpolli. Jon navat publična razvažaŭ pra mahčymaść svajoj hibieli, zajaŭlajučy, što jaho žyćcio nie maje značeńnia dla losu Isłamskaj Respubliki. Tym nie mienš u jaho było dva bunkiery, i kali b jon znachodziŭsia ŭ adnym ź ich, Izrail nie zmoh by jaho dastać.
Navat u červieni 2025 hoda, u razhar paŭnavartasnaj vajny, Izrail nie rabiŭ sprob bambić Chamieniei. Zamiest hetaha celami stanavilisia pieravažna kiraŭnictva Korpusa vartavych isłamskaj revalucyi, rakietnyja ŭstanoŭki i składy, a taksama jadziernyja abjekty i navukoŭcy Irana.
Adsočvańnie mišeniaŭ raniej patrabavała vizualnaha paćviardžeńnia i adsiejvańnia iłžyvych źviestak, ale za apošnija hady šyrokaje vykarystańnie ałharytmaŭ u zbory dadzienych u Izraili dazvoliła aŭtamatyzavać hetuju zadaču. Adnak dla takoj važnaj mišeni, jak Chamieniei, pravał byŭ niedapuščalny. Izrailskaja vajennaja daktryna patrabuje, kab dva roznyja vysokapastaŭlenyja aficery, pracujučy niezaležna adzin ad adnaho, z vysokaj dolaj upeŭnienaści paćvierdzili miescaznachodžańnie celi dla ŭdaru i skład jaje supravadžeńnia.
Dla harantyi pośpiechu izrailcianie vykarystali kambinacyju dadzienych. Pa-pieršaje, izrailskaja raźviedka mieła dadzienyja radyjoelektronnaha pierachopu, takija jak dostup da kamier darožnaha ruchu i hłybokaje praniknieńnie ŭ sietki mabilnaj suviazi. Adna z krynic adznačyła, što heta paćviardžała: sustreča z Chamieniei idzie pa hrafiku, i vysokapastaŭlenyja čynoŭniki nakiroŭvajucca da miesca pryznačeńnia.
Druhim važnym momantam, jak paviedamlajuć krynicy FT, stała infarmacyja ad ahienta, jakuju atrymała CRU.
Zahad na ataku daŭ Donald Tramp u piatnicu a 15:38 pa časie Vašynhtona, znachodziačysia na borcie prezidenckaha samalota Air Force One. Amierykanskija vajskoŭcy zabiaśpiečyli kibierpadtrymku, całkam aślapiŭšy iranskija sistemy suviazi i nazirańnia. Hienierał Den Kiejn, staršynia Abjadnanaha kamiteta načalnikaŭ štaboŭ ZŠA, paćvierdziŭ, što kibierataka parušyła zdolnaść Irana bačyć i reahavać.
Izrailskija źniščalniki vypuścili kala 30 vysokadakładnych rakiet pa kompleksie. Tramp paźniej paviedamiŭ, što iranskija lidary byli zabityja padčas śniadanku. Vybar dzionnaha času dla ataki dazvoliŭ dasiahnuć maksimalnaj taktyčnaj niečakanaści.
Ciapier čytajuć
Łukašenka pra vyzvaleńnie palitviaźniaŭ: Chočuć zastacca ŭ Biełarusi — kali łaska1
Kamientary