Ad pastucha da hałoŭnaha pastucha krainy: piać faktaŭ pra Leanida Anfimava

Siońnia Alaksandr Łukašenka pryznačyŭ novaha kiraŭnika Kamiteta dziaržkantrolu. Im staŭ 60-hadovy Leanid Anfimaŭ. «NN» prapanuje cikavyja fakty ź bijahrafii čynoŭnika.

Pracavaŭ pastuchom

Leanid Anfimaŭ naradziŭsia ŭ 1954 hodzie ŭ vioscy Sima Jurjeŭ-Polskaha rajona Uładzimirskaj vobłaści (Rasija). Kaža, što pačynaŭ pracavać pastuchom u vioscy. Sprava ŭ tym, što paśla 10 kłasa jon nie pastupiŭ va ŭniviersitet i źjechaŭ da babuli ŭ viosku, dzie treba byŭ pastuch. «Rabić było niama čaho, boŭtaŭsia na kanikułach. Paśviŭ 30 koniej i 20 žarabiataŭ», — raskazvaŭ Anfimaŭ.

Paśla pajšoŭ pracavać na zavod Hramadzianskaj avijacyi ŭ Minsku, byŭ elektramiechanikam.

Skončyŭ Politechničny instytut. «Nie tamu, što ja chacieŭ być mietałurham, ale moj adnakłaśnik uhavaryŭ pastupać razam. Skazaŭ mnie, što praź piać hadoŭ paśla raźmierkavańnia my staniem dyrektarami zavodaŭ», — raskazvaŭ sp.Anfimaŭ.

Pa raźmierkavańni jon trapiŭ na MAZ. Słužyŭ u vojsku aficeram u Marjinaj Horcy.

«Urešcie mianie zaprasili ŭ Zavodski rajkam partyi ŭ pramysłova-transpartny adździeł. Z hetaha i pačaŭsia karjerny ŭźlot», — raskazvaje Anfimaŭ.

Dalej była praca ŭ Minharvykankamie. Z krasavika 2006 Anfimaŭ — namieśnik kiraŭnika Administracyi prezidenta. U śniežni 2010 staŭ namieśnikam staršyni KDK.

Byŭ siabrom Hramadzianskaj partyi

U pačatku 1990-ch Leanid Anfimaŭ stajaŭ la vytokaŭ stvareńnia Hramadzianskaj partyi (jakaja ŭ budučyni pieraŭtvorycca ŭ AHP). Anfimaŭ, darečy, razam ź siońniašnim staršynioj Minabłvykankama Siamionam Šapira, uvachodziŭ u Nacyjanalny kamitet partyi.

Tahačasny sustaršynia Hramadzianskaj partyi Vasil Šłyndzikaŭ kaža: «Tolki dobraje mahu skazać. Čałaviek zaŭsiody byŭ pieradavych pohladaŭ. Jon rynačnik, libierał. Praŭda, ja ŭžo šmat hadoŭ ź im nie bačyŭsia i nie razmaŭlaŭ. Pry im Kamitet dziaržkantrolu nie pavinien pieraŭtvaracca ŭ zbroju suprać niaŭhodnych».

Darečy, kali Anfimaŭ uvajšoŭ u Hramadzianskuju partyju, jon užo pracavaŭ u Minharvykankamie. U toj čas jašče realna było sumiaščać siabroŭstva ŭ apazicyjnaj partyi i čynoŭnickuju pracu. «Ja nie pamiataju, kab jon pisaŭ zajavu na vychad, ci rabiŭ niejkija hučnyja zajavy. Chutčej za ŭsio, jon pa-raniejšamu ličycca siabrom AHP», — kaža sp.Šłyndzikaŭ.

Atrymaŭ učastak u Viaśnincy

Nie tak daŭno čynoŭnik atrymaŭ učastak dla budaŭnictva ŭ minskim elitnym mikrarajonie Viaśninka. Heta ŭsiaho za kiłamietr ad Drazdoŭ, na bierazie miascovaha vadaschovišča. Adnak budoŭlu jon pakul što nie pačynaŭ.

Pakul što siamja Anfimava žyvie ŭ trochpakajoŭcy na vulicy Kozyraŭskaj, niedaloka ad Červieńskaha rynku.

Žonka novaha staršyni KDK Viera Anfimava robić dabračynnyja achviaravańni na apieracyi dzieciam.

Pradkazvaŭ padzieńnie Amieryki

U 2011 hodzie, u samy razhar biełaruskaha valutnaha kryzisu, Leanid Anfimaŭ u prahramnaj publikacyi ŭ «Sovietskoj Biełoruśsii» pasprabavaŭ adkazać na hłabalnyja pytańni, što robicca ŭ suśvietnaj ekanomicy. Dla Anfimava było vidavočna, što ŭsie niehatyŭnyja tendencyi iduć z ZŠA. A ŭ procivahu staviŭsia azijacki aŭtarytarny kapitalizm kitajskaha kštałtu.

Anfimaŭ zaklikaŭ suśvietnuju supolnaść «nie dapuścić palityčny i ekanamičny kataklizm płanietarnaha maštabu, jaki vykliča padzieńnie Amieryki. Zachad hetaj impieryi ŭžo pačaŭsia», — vykazvaŭ mierkavańnie čynoŭnik.

Anfimaŭ paraŭnaŭ ZŠA z Rymskaj impieryjaj, Piersijaj, Załatoj Ardoj, Aŭstra-Vienhryjaj, Vielikabrytanijaj pačatku XX st. Pra SSSR jon ścipła zmaŭčaŭ.

Vudzić rybu z Łukašenkam?

Alaksandr Fiaduta ŭ adnym z artykułaŭ pra biełaruskuju čynoŭnickuju elitu padzialiŭsia historyjaj pra pośpiech Leanida Anfimava. Nibyta Łukašenka vudzić rybu z Anfimavym. «Ujavicie sabie, kolki važnych rečaŭ mohuć «pramaŭčać» pamiž saboj dvoje adnahodkaŭ, siedziačy na bierazie, dzie tolki jany — i ryba», — napisaŭ Fiaduta. 

Praŭda, paćvierdzić takija źviestki niemahčyma.

• 0
• 0
• 0
• 0
• 0
• 0
• 0
• 0