Čutki: Anłajnier zakryli, bo treba «na kahości zvalić vinu za kryzis», a BiełaPAN — za artykuł Kłaskoŭskaha

Šokam dla hramadstva stała adklučeńnie troch najbujniejšych resursaŭ zony.baj — Anłajniera, Navin.baj i sajta infarmacyjnaj kampanii BiełaPAN.

U vypadku Anłajniera źjaviłasia aficyjnaja zajava Apieratyŭna-analityčnaha centra pry prezidencie ab tym, što sajt byŭ «vyklučany z rejestra» «ŭ suviazi z vyjaŭlenymi Ministerstvam handlu Respubliki Biełaruś parušeńniami uładalnikam internet-resursu onliner.by zakanadaŭstva ab handli».

Paźniej pradstaŭnica Minhandlu zajaviła, što Anłajnier atrymaŭ nie adno papiaredžańnie pierad tym, jak być zakryty.

Viadoma, što partału stavili ŭ vinu vykarystańnie raźmieščanymi na im internet-kramami cenaŭ u dalarach i inšyja padobnyja parušeńni.

Što datyčyć Navinaŭ.baj i BiełaPANa — a Naviny.baj vydajucca BiełaPANam — to tut nijakaj aficyjnaj infarmacyi nie było, ale sajty zastajucca ŭ afłajnie.

Juryj Zisier u svaim Fejsbuku vykazaŭ mierkavańni, što adklučeńniu Anłajniera paspryjała rezkaść, ź jakoj jaho dyrektar razmaŭlaŭ z čynoŭnikami ź Ministerstva handlu.

Varta adznačyć, što dyrektar Anłajniera Alaksandr Stelmach tydzień tamu niečakana syšoŭ sa svajoj pasady. Ad kamientaroŭ «Našaj Nivie» jon admoviŭsia.

U Fejsbuku Stelmach kateharyčna zapiarečyŭ Zisieru i zajaviŭ, što zaŭsiody razmaŭlaŭ z čynoŭnikami karektna, a Zisier nie moža viedać, bo na tych sustrečach nie prysutničaŭ.

«Vpročiem, za ton nie baniat, prosto portał pod horiačuju ruku popałsia: nado žie na koho-to svaliť vinu za valutnyj krizis», — pahadziŭsia Zisier.

Što datyčyć BiełaPANa, to adklučeńnie moža być pakarańniem za śmieły artykuł Alaksandra Kłaskoŭskaha «Biełaruski «narodziec» płacić zbor za palityčny infantylizm», jaki šyroka razyšoŭsia ŭ internecie ŭ dzień, kali stała viadoma pra 30-pracentavy zbor. Viadoma, što jon vyklikaŭ hnieŭ u Ministerstvie infarmacyi.

Nijakich farmalnych pretenzij da hetaha artykuła vystavić niemahčyma, tamu i tłumačeńniaŭ banu niama.

Adnak jakimi b ni byli padstavy, heta, jak vyhladaje, tolki začepki. Adnačasova byŭ zabłakavany dostup da «Chartyi», «Biełaruskaha partyzana», «Salidarnaści» i inšych sajtaŭ, jakija ź Minhandlu nie badalisia. U piatnicu na try hadziny adklučali navat Tut.baj. Takim čynam, u svajoj sutnaści heta prosta paśladoŭnaja palityka, skiravanaja na abmiežavańnie svabody słova. A vina znojdziecca.

Varta adznačyć, što efiekt ad zakryćcia partałaŭ budzie tolki častkovy, psichałahičny. Čynoŭniki nie zdolnyja pierakryć dostup da sajtaŭ, raźmieščanych za miežami Biełarusi, nie ŭ zonie.baj. Čytačy zaŭždy zmohuć vychodzić na ich praz Opieru Turba abo praz ananimajziery. Takich sposabaŭ — bieźlič, i jany vielmi prostyja, dastupnyja kožnamu.

• 0
• 0
• 0
• 0
• 0
• 0
• 0
• 0