Pucin zaklikaŭ ukrainskija vojski ŭ Debalcavie skłaści zbroju: Vas pieramahli byłyja šachciory i traktarysty
Prezident Rasii Uładzimir Pucin zaklikaŭ ukrainskija vojski ŭ Debalcavie skłaści zbroju.
«Pa ŭsioj linii sudakranańnia bolš-mienš cicha, — skazaŭ jon u časie vizitu ŭ Budapiešt. — Treba skončyć prablemu, źviazanuju z atočanaj hrupoŭkaj. Naša supolnaja zadača zaklučajecca ŭ tym, kab vyratavać žyćcio ludziej, jakija apynulisia ŭ hetym «katle», i kab hety naryŭ nie pahoršyŭ adnosiny pamiž aficyjnymi ŭładami i rušeńniem Danbasa», — zajaviŭ Pucin na pres-kanfierencyi paśla zakančeńnia pieramovaŭ z premjeram Vienhryi.
Na adras Ukrainy jon dadaŭ: «Viadoma, prajhravać zaŭsiody drenna, viadoma, heta zaŭsiody biada dla tych, chto prajhraŭ, asabliva kali prajhraješ učorašnim šachcioram abo učorašnim traktarystam. Ale žyćcio jość žyćcio, jana dakładna pojdzie dalej, i ja b ličyŭ niepatrebnym na hetym zacyklivacca», cytuje jaho ahienctva TASS.
Apałčencaŭ ža z DNR i ŁNR rasijski lidar zaklikaŭ adpuskać ŭkrainskich vajskoŭcaŭ z debalcaŭskaha «katła» da ich siemjaŭ.
«Toje, što tam adbyvajecca, — heta vytłumačalna i prahnazavana, bo, pa našych dadzienych, jašče da sustrečy ŭ Miensku — za tydzień prykładna — hrupoŭka ŭkrainskich vojskaŭ tam apynułasia tam u atačeńni».
U toj ža čas ułady samaabvieščanaj Danieckaj narodnaj respubliki pieraścierahli naziralnikaŭ ABSIE ad naviedvańnia Debalcava. Pra heta zajaviŭ pradstaŭnik bajevikoŭ u kantaktnaj hrupie Dzianis Pušylin.
Debalcava — važny čyhunačny vuzieł na šlachu z Daniecka ŭ Łuhansk. Ukrainskija pazicyi ŭ Debalcavie klinam urazalisia ŭ rasijskija, što dazvoliła rasijskim siłam adrezać harnizon horada. Kołca vakoł Debalcava samknułasia niekalki tydniaŭ tamu. U aŭtorak bai pieramiaścilisia ŭnutr horada, padzieńnie jakoha stała niepaźbiežnym.
Rasijskija siły majuć bolšaje i lepšaje ŭzbrajeńnie, čym ukraincy. Ale aficyjna Maskva nie pryznaje svajho ŭdziełu ŭ kanflikcie, zajaŭlajučy, što suprać ukrainskaj armii vajujuć «miascovyja apałčency». Pry hetym «DNR» i «ŁNR» majuć na ŭzbrajeńni sučasnyja sistemy załpavaha ahniu, tanki i procipavietranyja kompleksy.
Apytanka
Kamientary