U homielskaj apazicyi pieratrusy, dziŭnaja sprava, parnahrafičny padychod
50-hadovaha baćku čatyroch synoŭ Leanida Sudalenku «padazrajuć» u tym, što jon pavinšavaŭ dziaržorhany z 8 Sakavika parnahrafičnym rolikam.
Homielskaha pravaabaroncu-viasnoŭca Leanida Sudalenku zaprasili ŭ Šviecyju na kanfierencyju «Dzień pravaabaroncy». Ale pieršy dzień kanfierencyi dla jaho pačaŭsia z telefanavańnia žonki. «Mianie milicyja zabrała z raboty, u nas doma budzie pieratrus».
Udoma ŭ pravaabaroncy praviali, havoračy jurydyčnaj movaj, nie vobšuk, a ahlad. Vynikam hetaha stała kanfiskacyja, dakładniej, «vymańnie» sistemnaha błoka kampjutara, a taksama noŭtbuka.
6 kampjutaraŭ milicyja zabrała ŭ domie pa adrasie Paleskaja, 52 — supolnaj siadzibie niezaležnych arhanizacyj Homiela, dzie pracuje i Sudalenka.
Jak raskazaŭ Vasil Palakoŭ, namieśnik Anatola Labiedźki ŭ Abjadnanaj hramadzianskaj partyi, milicyjanty pryjšli z pastanovaj na vobšuk i sankcyjaj prakurora. Jany patłumačyli, što z IP-adrasa, atrymanaha abanientam na Paleskaj,52, nibyta byŭ dasłany parnahrafičny rolik, i tamu zaviedziena kryminalnaja sprava.
Darečy, pry dałučeńni da Wi-Fi abanient atrymlivaje taksama anałahičny IP-adras, jak i na Paleskaj, 52, kažuć u Homieli.
Žonka Leanida Sudalenki paviedamiła trochi bolš padrabiaznaściaŭ pra spravu. Nibyta, 6 sakavika na mejł padatkovaj inśpiekcyi dy inšych dziaržstruktur pryjšło vinšavańnie z Žanočym dniom u vyhladzie parnahrafičnaha rolika. Pryčym pryjšło z mejła pravaabaroncy Sudalenki.
«Heta łuchta i dzikaść, — skazaŭ «Našaj Nivie» Sudalenka. — Pa-pieršaje, žoncy pakazali niejki paštovy adras na mail.ru, a ja nie karystajusia rasijskim servisam, ja maju poštu na gmail-je. Pa-druhoje, lubuju poštu lohka ŭzłamać, a IR-adras chakier ź lohkaściu moža źmianić. Pa-treciaje, ja juryst, pravaabaronca, viedaju zakony. Niaŭžo niechta pavieryć, što ja moh tak chulihanić?»
Milicyja nie abmiežavałasia vyvazam kampjutaraŭ. Jana jašče zabrała na dopyt 18-hadovaha syna Sudalenki, jaki akurat u toj momant viarnuŭsia z vajenkamata (jon idzie ŭ armiju). I voś, što ŭ jaho pytalisia, pieraličvaje Sudalenka: «Kim pracuje tata? Čym zajmajecca? Na jakoj mašynie tata jeździć? Kali jon apošni raz byŭ udoma? Ci ŭvachodzić jon u palityčnyja partyi? I ci «sastaić» u apazicyi?»
Usiaho ŭ Sudalenki čatyry syny. Starejšamu 28 hadoŭ, małodšamu — 5.
50-hadovy zdaraviak Leanid Sudalenka nie chavaje svajoj horyčy. Jon nahadvaje, što try miesiacy dabivaŭsia ad milicyi rasśledavańnia pahroz jahonamu synu, što prahučali na adnym ź miascovych sajtaŭ, jaki jon źviazvaje z uładnymi strukturami.
Sudalenka nie schilny pravodzić paraleli ź niadaŭnim vymańniem kampjutaraŭ u pravaabaroncaŭ-viasnoŭcaŭ u Mahilovie.
Nikoli raniej u pravaabaroncaŭ i aktyvistaŭ u Homieli nie vymali techniki na takoj padstavie. «Ale mnie siońnia tut raskazali ŭźbiekskija kalehi, — kaža Sudalenka, — što ŭ ich takija paklopnickija abvinavačvańni časta praktykujucca».
Jahonyja kalehi z Homiela pakul nie navažvajucca mierkavać, što staić za takoj atakaj. Heta «zvyčajnaje» pieryjadyčnaje zastrašvańnie dla padtrymańnia ŭzroŭniu strachu ŭ hramadstvie, heta ŭdar pa aktyŭnym pravaabaroncu Sudalenku, heta čarhovaja ataka na viasnoŭcach ci ŭskosnaja sproba asłabić prychilnikaŭ Anatola Labiedźki, jaki zajaviŭ pra svaje prezidenckija ambicyi? Homiel — adna z aporaŭ AHP. U minułyja hady cisk na apazicyju tut byŭ asabliva mocny, supastaŭny z tym, jaki nazirajecca ŭ Hrodnie.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary