U efiry ŭžo praź miesiac!
Prajekt biełaruskaj ahučki multsieryjała «Śvinka Pepa» sabraŭ na Talaka.by nieabchodnuju sumu dla pierakładu pieršaha siezonu.
Sabranych 37,6 młn chopić na pierakład pieršych 52 sieryj. Ale heta tolki čverć sieryjału — kali źbiarecca bolš hrošaj, budzie pierakładziena bolš sieryj, až da poŭnaha pierakładu čatyroch siezonaŭ.
Pierakładčyki ŭžo pačali pracu, raspavioŭ kiraŭnik prajektu «Kinakonh» i inicyjatar pierakładu Andrej Kim. Ale hrošy pierakładčyki atrymajuć tolki pa zaviaršeńni kampanii, praz 32 dni. Praviły Talaka.by dajuć mahčymaść padčas kampanii tolki paabiacać achviaravać hrošy — mienavita achviaravańni prymajucca i pieradajucca pa zaviaršeńni kampanii.
Jak kaža Kim, peŭnaja častka sieryj užo pierakładzienaja — «Kinakonh» płanuje pačać vydavać sieryi na Youtube pad zaviaršeńnie kampanii pa try na tydzień.
Kali pierakładčyki źbiaruć jašče 37-38 młn, budzie pierakładzieny i druhi siezon, što daść mahčymaść vypuskać sieryi da kanca 2015 hoda.
Pierakładčyk adznačaje, što heta i pieršy publičny zbor hrošaj dla «Kinakonha». Kampanija dazvoliła paznajomicca z sotniaj ludziej, hatovych dać hrošy na pierakład, — chto pa 50 tysiač, chto pa niekalki miljonaŭ.
Kim adznačaje, što «Śvinka Pepa» — adzin ź niamnohich «pazityŭnych» kraŭdfandynhavych prajektaŭ Biełarusi. Čaściej biełarusy achviarujuć hrošy na dapamohu chvorym ci achviaram niespraviadlivaści, značna radziej hrošy źbirajucca na pazityŭnyja spravy.
«Kinakonh» nie spynić svaju dziejnaść pa zvyčajnych, nie kraŭdfandynhavych pierakładach. Ale adnosna chutki pośpiech kampanii dazvalaje pierakładčykam maryć ab nastupnych kraŭdfandynhavych prajektach — ad pierakładaŭ kankretnych stužak ci sieryjałaŭ da biełaruskamoŭnaha anłajn-kinateatra.
***
«Śvinka Pepa» — brytanski dziciačy multsieryjał, što tranślavaŭsia z 2004 pa 2012 hod. Byŭ pakazany ŭ bolš čym 180 krainach śvietu. Tolki na prodažy cacak pa matyvach multfilma -stvaralniki zarabili 200 młn funtaŭ. Pravaŭładalnik dazvalaje vykładvać pierakład dla volnaha prahladu na Youtube.
Kamientary