Alaksiej Mirašničenka pracavaŭ u pryfrantavoj zonie, a jahony brat Juryj — pad dypłamatyčnym prykryćciom u pasolstvie Ukrainy ŭ Francyi.
Słužba biaśpieki Ukrainy abvinavačvaje ŭ dziaržaŭnaj zdradzie dvuch aficeraŭ Słužby zamiežnaj vyviedki. Pra heta kiraŭnik SBU Valancin Nalivajčanka raskazaŭ žurnalistam u aŭtorak.
«Siońnia nami raspačata kryminalnaja sprava pa artykule «dziaržaŭnaja zdrada» pa fakcie pierachodu na bok rasijska-terarystyčnych vojskaŭ dvuch aficeraŭ słužb», — skazaŭ Nalivajčanka.
«My, Słužba biaśpieki, asprečvajem ich złačynnyja pakazańni, a taksama intervju, jakija jany tam razdajuć. Pakarańnie dla ich budzie niepaźbiežnym», — skazaŭ Nalivajčanka.
Braty Mirašničenki — uradžency Łuhanska.
«My vyrašyli viarnucca ŭ rodny horad. Rašeńnie my pryniali dobraachvotna, nichto nas nie prymušaŭ. My bolš nie možam mirycca z tym, što dziejecca na Ukrainie. Tam zasieli zdradniki, fašysty, ahienty śpiecsłužbaŭ, jakija viaduć krainu da krachu», — raskazaŭ Alaksiej Mirašničenka na pres-kanfierencyi, jakuju pakazali ŭsie pucinskija telekanały.
Praŭda, havaryli Mirašničenki aby-što. Naprykład, sa słovaŭ Alaksieja Mirašničenki, amierykanskija śpiecsłužby mieli namier vazić dalary dla pratestoŭcaŭ Jeŭramajdanu praz aeraport Łuhanska.
«Vidavočna usio [Jeŭramajdan] było prapłočana i arhanizavana śpiecsłužbami ZŠA. Jašče da zachopu Łuhanskaha budynka SBU była infarmacyja, što amierykanski samalot prasiŭ vymušanuju pasadku ŭ aeraporcie Łuhanska, adnak jamu było admoŭlena. Pavodle apieratyŭnaj infarmacyi, na borcie było paŭtony dalaraŭ dla pratestujučych na Majdanie», — kaža pierabiežčyk na videa Łajfńjus.
Nahadajem, što aeraport Łuhanska — najdalejšy ad Kijeva, a rehijon nadziejna kantralavaŭsia Janukovičam.
Za čas kiravańnia Viktara Janukoviča vychadcy z Daniecka i Łuhanska, jahony kłan, zaniali klučavyja pazicyi va ŭkrainskich siłavych strukturach. Ziemlaki Janukoviča ŭznačalvali usie siłavyja viedamstvy. U vyniku ŭ časie ahresii Rasii praca siłavikoŭ była častkova paralizavanaja.
Kamientary