Złučanyja Štaty Amieryki paprasili Polšču pierakinuć adnu sa svaich rakietnych batarej Patriot i niekatoryja rakiety PAC-3 MSE na Blizki Uschod. Pra heta havorycca ŭ publikacyi vydańnia Rzeczpospolita, piša «Jeŭrapiejskaja praŭda».
Amierykancy nieaficyjna źviarnulisia da Polščy z prośbaj razhledzieć mahčymaść pieradačy na Blizki Uschod adnoj ź dźviuch batarej sistem SPA Patriot i rakiet-pierachopnikaŭ PAC-3 MSE, jakija ŭžo byli dastaŭlenyja ŭ Polšču i źjaŭlajucca ŭłasnaściu polskaj armii.
Armija Polščy maje dźvie batarei sistemy Patriot, kudy ŭvachodziać 16 puskavych ustanovak. Jany dasiahnuli poŭnaj apieratyŭnaj hatoŭnaści ŭ kancy 2025 hoda. Hetaje abstalavańnie dazvalaje źniščać varožyja rakiety abo samaloty z adlehłaści da 100 km. Puskavyja ŭstanoŭki mohuć, siarod inšaha, stralać rakietami PAC-3 MSE, jakich było zamoŭlena prykładna 200 pa kantrakcie, padpisanym u 2019 hodzie. Bolšaść ź ich užo znachodziacca ŭ Polščy.
Pastaŭki nastupnych šaści batarej, kantrakty na jakija zaklučyli vosieńniu 2023 hoda, čakajucca ŭ 2027 hodzie. Tady było zamoŭlena prykładna 600 rakiet PAC-3. Hetyja pastaŭki jašče nie pačalisia.
Paśla publikacyi hetaha artykuła ministr nacyjanalnaj abarony Polščy Uładzisłaŭ Kasiniak-Kamyš napisaŭ u sacsietcy Ch, što polskija batarei Patriot i ich zbroja vykarystoŭvajucca dla abarony polskaha nieba i ŭschodniaha fłanha NATA.
«Ničoha ŭ hetym płanie nie źmianiłasia, i my nie płanujem ich nikudy pieradysłakavać! Našy sajuźniki viedajuć i razumiejuć, nakolki važnymi źjaŭlajucca našy zadačy tut. Biaśpieka Polščy — naš absalutny pryjarytet», — napisaŭ Kasiniak-Kamyš.
Pavodle źviestak vydańnia Politico, pradstaŭniki administracyi amierykanskaha prezidenta Donalda Trampa niadaŭna pačali papiaredžvać inšyja krainy, što pastaŭki zbroi ZŠA va Ukrainu mohuć być pierapynienyja ŭ najbližejšyja miesiacy, pakolki Pientahon addaje pryjarytet jaje vykarystańniu ŭ vajnie ŭ Iranie.
Dziaržaŭny sakratar ZŠA Marka Rubia adznačyŭ, što ZŠA pakul nie pieranakiroŭvajuć zbroju dla Ukrainy na Blizki Uschod, ale mohuć heta zrabić.
Zialenski: Pakul pieranakiravańnia zbroi z Ukrainy na Blizki Uschod niama, a tam pabačym
Finlandyja inicyjavała pravierku, ci sapraŭdy apłačanaja Jeŭropaj amierykanskaja zbroja idzie Ukrainie
Rubia paćvierdziŭ, što ZŠA mohuć pieranakiravać zbroju, pryznačanuju dla Ukrainy, na Blizki Uschod
Pientahon moža pieranakiravać pastaŭki zbroi, pryznačanaj dla Ukrainy, u Iran
Kamientary