Čamu nam padabajecca hitaryst-mściviec? — pra heta razvažaje na svaim błohu Siarhiej Astraviec.
Kino z Banderasam chočacca hladzieć zaŭždy jak traplajecca ŭ prahramie, navat kali atrymlivajecca trecim-čaćviertym razam. Vialiki hitarny futarał sa zbrojaj... Čamu ty niekalki razoŭ hladziš hety bajavik z Banderasam? Kali navat na surjoznaje kino treba časam nastrojvacca niby na raman. Bo ŭsio astatniaje ciabie prosta nie cikavić. Usialakija tok-šoŭ, ichnija naviny, zroblenyja na mašynie času, i seryjały, ichniaja papsa, ichniaja telečarka sa skvarkaj.
A voś ža simpaciaha z hitaraj dasiahaje možna skazać terapeŭtyčnaha efektu: hladač štoraz bačyć, jak płachitasy kazyracca, brydka łajucca, palać biazładna, jak umiejuć, ale im kapcy, u Banderasa ŭ futarale ceły arsenał i jon nie pudłuje, adno naciskaje na cynhiel dy źmianiaje nabojni. Moj pryjaciel taksama hladzieŭ Desperados, jon kaža: ab tryjo hitarystaŭ možna tolki maryć… Efekt uzmacniajecca jašče tym, što płachitasy čuli pra hitarysta-strałka, jany bajacca zahadzia, jany trymciać. Našyja vorahi taksama trymciać, davoli pierakanaŭča kaža moj pryjaciel, chaciełasia b vieryć jamu.
O, mužyk-biełarus, chočacca vyhuknuć ahulna, biezasabova, a kaho baišsia ty, praz kaho trymciš? I jak daješ sabie rady z hetym? Ci zastałosia ŭ ciabie boh-vied-jak-kolišniaje, ahučanaje paetam (ci prydumanaje im?) žadańnie, navat, baccam by, praha zvacca čałaviekam nie druhoha hatunku? Nie druhoha hatunku, zaznačym: zusim nie na halerach, nia ŭ kataržnych kapalniach, nia ŭ šachtach Danbasu, nie na lahiernych budoŭlach kamunizmu, a ŭ siabie doma, u matčynaj chacie.
U minułyja časy, kali ŭ skryncy jašče traplalisia roznyja tvary, a nie adzin-adnolkavy, dobry čałaviek usio niešta apraŭdvaŭsia, usio śpiavaŭ adnastajnuju pieśniu “družba-frojndšaft”, hledačy kipiacilisia pierad ekranam: dajcie hetamu katu Leapoldu aźviarynu!! Ale ŭ žyćci aźviaryn spažyvajuć inšyja, piacichvilinki nianaviści pieratvarajucca ŭ piacihodki, nie rassłabišsia. Zastajecca adno kino z Banderasam.
Niachaj. Pojdzieš voźmieš z šafki plašačku Desperados z-za kalučaha drotu, aramatyzavanuju pad tekiłu, pračytaješ: zroblena ŭ krainie zachodniaj demakratyi. Da kina z Banderasam ciažka ŭjavić štoś bolš adpaviednaje, pryzabytuju plašačku, nabytuju jašče da šenhienskich abmiežavańniaŭ. Sam jon jakraz u reklamnych paŭzach źjaŭlajecca sa svajoj parfumaj: mužny vyhaleny mužčyna, ramantyčnaja žančyna, pachkija burbałki ŭ pavietry. A potym znoŭku — stužka z płachitasami, jakimi kiruje žorstki, biaźlitasny Buča. Jany jaho sami bajacca jak ahniu! Čamuś uspłyvajuć radki paeta: “U našym krai panuje čužak…”
Kamientary