Usie jany tak ci inakš źviazanyja ź miedycynaj.
«Biuro» vyrašyła vyvučyć bijahrafii i miescy pracy inšych novaśpiečanych svajakoŭ Iryny Abielskaj, jakaja pracuje pracuje doktarkaj u Respublikanskim kliničnym centry Kiraŭnictva spravami i značycca siarod supracoŭnikaŭ «Fondu pieršaha».
Vyjaviłasia, što ŭsie jany tak ci inakš źviazanyja ź miedycynaj.
Starejšy syn Iryny Abielskaj Dźmitryj žanaty ź Dzinaj el-Dziefi. Rodnaja siastra Dziny Dalja el-Dziefi — aśpirantka Biełaruskaha dziaržaŭnaha miedycynskaha ŭniviersiteta i akušerka-hiniekałahinia pryvatnaha miedcentra «Nardzin».
Muž Dalji Ilja Siańko ŭładalnik i dyrektar kampanii «Dystrymied», jakaja śpiecyjalizujecca na hurtovaj dystrybucyi i prasoŭvańni vyrabaŭ miedyčnaha pryznačeńnia, raschodnych materyjałaŭ i miedyčnaj techniki ŭ Biełarusi.
Kampanija aktyŭna ŭdzielničaje ŭ dziaržaŭnych zakupkach. U 2025 hodzie vyručka kampanii skłała 3,2 miljona rubloŭ, a čysty prybytak — 14 tysiač rubloŭ.
Rodny brat Dziny i Dalji Chasan el-Dziefi pracuje dziciačym chirurham u «Nardzinie». A voś karjera jaho žonki Julii doŭhi čas raźvivałasia zusim u inšym napramku. Julija el-Dziefi pracavała ŭ administracyi Parku vysokich technałohij, a zatym — u administracyi Łukašenki. U dastupnych dla «Biuro» dakumientach jana fihuruje tam jak daradčyca-kansultantka hałoŭnaha ideałahičnaha ŭpraŭleńnia.
U krasaviku 2021 hoda Julija pierajšła ŭ Respublikanski kliničny miedycynski centr Kiraŭnictva spravami Łukašenki — toj samy, jakim kiruje Iryna Abielskaja. A paśla taho jak Abielskaja ŭvajšła ŭ Saviet Respubliki, Julija el-Dziefi stała jaje aficyjnaj pamočnicaj.
Miedycynski śled jość i ŭ cieścia Abielskaha, baćki Dziny — Fiejsała Muchamieda Rychana el-Dziefi.
Šmat hadoŭ jon byŭ źviazany ź Biełaruska-paleścinskaj abščynaj. U roznych dakumientach Fiejsał fihuruje to jak jaje prezident, to jak sustaršynia. Z 2020 hoda Fiejsał značycca siarod rabotnikaŭ kampanii «Rajt Step».
Firma zajmajecca miedycynskim turyzmam i supracoŭničała ź Minskaj abłasnoj kliničnaj balnicaj u pryciahnieńni pacyjentaŭ ź Livii. Havorka išła ab prasoŭvańni siarod livijcaŭ urałahičnych apieracyj, a taksama pasłuh u halinie nieŭrałohii i traŭmatałohii. U 2025 hodzie vyručka «Rajt Step» skłała 4,4 młn rubloŭ, čysty prybytak — 1,2 młn.
Kamientary