Siońnia a 21:45 na «Barysaŭ-Arenie» naš BATE budzie prymać słavutuju «Barsiełonu», adzin z samych papularnych kłubaŭ u śviecie. «Naša Niva» sabrała cikavyja fakty pra supiernika BATE.
«Bolej, čym prosta kłub»
MES QUE UN CLUB — vialikimi litarami napisana na chatnim stadyjonie «Barsiełony» «Kamp Nau». U pierakładzie z katałanskaj movy heta značyć «Bolej, čym kłub». Hetaja fraza źjaviłasia ŭ 1968 hodzie i padkreślivaje nie tolki važnaść kamandy, ale i siłu katałonskaha duchu.
U čas Hramadzianskaj vajny ŭ Ispanii «Barsiełona» była adnym ź simvałaŭ antyfašysckaha ruchu. U 1936 hodzie frankistami byŭ rasstralany prezident kamandy Chasep Suńjol, jaki byŭ siabram levaj partyi. Praz hod, kali kamanda ździajśniała turne pa ZŠA, pałova kamandy vyrašyła nie viartacca na Radzimu.
Šviejcarac z pakručastym losam
Dziŭna, ale zasnavalnikam vialikaj «Barsiełony» źjaŭlajecca zusim nie katałoniec i navat nie ispaniec, a šviejcarac Žaan (heta katałanskaje imia, jakoje jon pryniaŭ zamiest svajho Hans) Hampier. Adbyłosia heta ŭ 1899 hodzie. Taksama hety čałaviek byŭ siarod zasnavalnikaŭ futbolnych kłubaŭ «Bazel» i «Ciurych» (taksama pryjazdžaŭ sioleta ŭ Biełaruś) na radzimie.
Užo ad pieršych hadoŭ svajho isnavańnia kamanda prademanstravała, što budzie zmahacca tolki za samyja vysokija miescy, vyjhravajučy Kubak Piryniejaŭ i Katałonii.
Cikava prasačyć dalej los Žaana Hampiera. U 1925 hodzie dyktatar Ispanii Pryma de Ryviera abvinavaciŭ Hampiera ŭ sadziejničańni katałonskamu nacyjanalizmu. Sprava ŭ tym, što pierad hulniami zaŭziatary aśvistvali himn Ispanii. Kiraŭnictva krainy zabaraniła šviejcarcu lubyja kantakty z kamandaj. U 1930-m Hampier zastreliŭsia.
«Barsiełona» i Franka
Fransiska Franka ŭ 1956 hodzie zabaraniŭ «Barsiełonie» nazvać novy stadyjon imiem Žaana Hampiera. Z asobaj Franka, jaki byŭ zaŭziatym prychilnikam «Reała», źviazanaja jašče adna historyja. Kažuć, kaŭdyljo naviedaŭ raździavalniu «Barsy» pierad matčam u adkaz finała Kubka Hienieralisimusa ŭ 1943 hodzie. Pieršy matč «sinie-hranatavyja» vyjhrali 3:0, a voś paśla naviedvańnia Franka sastupili ź likam 1:11. Chacia stopracentnaha paćvierdžańnia hetaja historyja nie maje.
Kamanda zorak
«Barsiełona» zaŭsiody była kamandaj, jakaja pryvablivaje najmacniejšych hulcoŭ śvietu. Šeść hulcoŭ kamandy atrymlivali «Załaty miač» (Łuis Suares, Jochan Krojf, Chrysta Stoičkaŭ, Ryvałda, Ranaldzińjo, Lijanel Miesi). Ranałda i Miesi stanavilisia ŭładalnikami «Załatoj bucy».
Tolki za dva apošnich dziesiacihodździ za «Barsiełonu» pahulali: Ińjesta, Chavi, Ramarya, Eto'o, Pikie, Valdes, Vilja, Fabrehas, Savijoła. Nu i, viadoma, Miesi — samy talenavity futbalist sučasnaści.
Byŭ u «Barsiełonie» i biełaruski śled. Siezon 2008/2009 u formie sinie-hranatavych siezon pravioŭ Alaksandr Hleb. Za «Barsu» 19 matčaŭ, hałoŭ nie zabivaŭ, prabicca ŭ asnovu tak i nie zdoleŭ. Paźniej Hleb usio tłumačyŭ svaim kiepskim charaktaram.
Hulali z BATE
U 2011 hodzie BATE ŭžo hulaŭ suprać «Barsiełony». U Minsku našy sastupili ź likam 0:5. Tady trenier Hančarenka vypuściŭ na hulniu niekalki dubloraŭ, za heta viadomy rasijski kamientatar Utkin skazaŭ, što Hančarenka «musić hareć u piekle». Praz dva z pałovaj miesiacy ŭ Katałonii dublujučy skład «Barsy» raspraviŭsia z BATE ź likam 0:4. Moža, na hety raz usio budzie nie tak sumna?
Kamientary