Mihracyjnamu kryzisu ŭ Jeŭropie znajšłosia rašeńnie: Turcyja prapanavała zabirać nazad usich nielehalnych mihrantaŭ
Uzamien Ankara prosić chutčejšaje dałučeńnie da Jeŭrasajuza, finansavuju dapamohu i ŭviadzńnie biaźvizavaha režymu. Krainy ES hatovy pajści na taki krok. Pryniaćcie kankretnaha rašeńnia adkłali dla ŭdakładnieńnia detalaŭ pahadnieńnia.
Jak pieradaje ahienctva Rojterz, sustreča kiraŭnikoŭ 28 krain Jeŭrasajuza i Turcyi ŭ Bruseli dała pazityŭny vynik. Turcyja vystupiła sa śmiełymi prapanovami.
Kiraŭniki Jeŭrasajuza pryvitali prapanovu Turcyi prymać nazad usich mihrantaŭ, jakija traplajuć u ES praź jaje terytoryju, u tym liku terytaryjalnyja vody.
Jak miarkujecca, kančatkova pakietnaje pahadnieńnie z Turcyjaj budzie dasiahnuta 17—18 sakavika.
Za 2015 hod u Jeŭrasajuz prybyło 1,2 miljona ŭciekačoŭ. Bolšaść ź ich trapiła z Turcyi na astravy Hrecyi, paśla — na maciaryk, i dalej praz Bałkany ŭ Hiermaniju. Sama kolkaść u pieraliku na dušu nasielnictva supastaŭnaja z tym, kolki ŭkrainskich uciekačoŭ pryniała Biełaruś za 2014-y, ale heta kali pieraličvać na ŭvieś Jeŭrasajuz. Adnak u ES usie ŭciekačy kancentravalisia ŭ Niamieččynie i pary inšych bahatych krain Jeŭropy, heta stvarała prablemy ź ich adaptacyjaj i intehracyjaj.
Turcyja prosić uvieści ź joj biaźvizavy režym da kanca 2016 hoda. Jeŭrasajuz vystaŭlaje dla hetaha dźvie ŭmovy — uviadzieńnie bijamietryčnych pašpartoŭ, jakija ciažka padrablać, i admiena biaźvizavaha režymu miž Turcyjaj i niekatorymi inšymi musulmanskimi krainami, ź jakimi ŭ Turcyi ciapier dziejničaje biaźvizavy ŭjezd.
Što da pieramovaŭ pra ŭstupleńnie Turcyi ŭ ES, to ich tarmozić pieradusim dalikatnaje pytańnie padzielenaha Kipra.
Tym nie mienš, staršynia Jeŭrapiejskaj Rady Donald Tusk dazvoliŭ sabie skazać na supolnaj z tureckim premjeram Davutahłu pres-kanfierencyi pa vynikach samita: «Času biazładnaj mihracyi ŭ Jeŭropu pryjšoŭ kaniec».
Ciapier čytajuć
«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy136136
Kamientary