Susied «zdaŭ» susiedku milicyi za ŭdzieł u mitynhu: «Nie liču, što heta byŭ danos»
U sudzie Centralnaha rajonu Miensku budzie razhledžanaja administracyjnaja sprava miančanki Haliny Łahackaj, jakuju abvinavačvajuć va ŭdziele ŭ niesankcyjanavanym mitynhu pradprymalnikaŭ 22 lutaha na Kastryčnickaj płoščy. Sprava admietnaja tym, što milicyi pra ŭdzieł Haliny Łahackaj u mitynhu paviedamiŭ žychar domu, dzie žyvie aktyvistka.
«U dačynieńni da Haliny Łahackaj pratakoł nie składaŭsia i ŭ RUUS jaje nie vyklikali. Tym nia mienš dniami žančyna atrymała pozvu ŭ sud. A padstavaj dla administracyjnaj spravy źjaviłasia zajava pilnaha hramadzianina, jaki paznaŭ Łahackuju pa fatazdymku ŭ internecie. U jakaści «dobraachvotnaha pamočnika milicyi» ŭ lepšych tradycyjach stalinskich časoŭ vystupiŭ susied pa domie pensijaner Valer Milevič, jaki napisaŭ zajavu na adras UUS Mienharvykankamu», — paviedamiŭ sajt zakrytaha ŭładami pravaabarončaha centru «Viasna».
Čamu susied uziaŭsia pisać zajavu na susiedku? Pavodle zajavy Valera Mileviča, jaho aburyŭ źmiest plakata, jaki trymała Halina Łahackaja na mitynhu pradprymalnikaŭ.
«Pradprymalnik sumlenny čałaviek, a ŭłada bandyckaja», — było napisana na plakacie Łahackaj. «Ukazany na plakacie Łahackaj H. I. nadpis źjaŭlajecca dla mianie źnievažalnym, u suviazi z čym ja napisaŭ zajavu ŭ HUUS Mienharvykankamu z prośbaj pryciahnuć jaje da adkaznaści», — skazaŭ pensijaner Valer Milevič, kali jaho apytvali ŭ milicyi. Hetak paznačana ŭ kopii pratakołu, jakuju Halina Łahackaja prademanstravała karespandentu Svabody.
Pryčynu inicyjatyvy Valera Mileviča Halina Łahackaja bačyć u kanflikcie, jaki ŭžo nia pieršy hod praciahvajecca pamiž susiedam i joj.
«Ja namieśnik staršyni žyllovaha kaaperatyvu, a Valer Milevič — siabra hetaha kaaperatyvu, jon žyvie ŭ susiednim padjeździe. Kanflikt pačaŭsia z taho, što spadar Milevič staŭ karystacca vazočnym pakojem na placoŭcy, kudy vychodzić jahonaja kvatera. Ale hety pakoj pavinien naležać usim žycharam, a nie jamu adnamu, i jaho nielha zamykać na ŭłasny zamok. Maje sproby jak namieśnika staršyni kaaperatyvu heta spynić vyklikali burnaje supraćdziejańnie. U vyniku my ŭžo prajšli praź niekalki sudoŭ. U tym liku była kryminalnaja sprava, zaviedzienaja na mianie za nibyta ŭvarvańnie ŭ jahonuju kvateru, jakuju ja spačatku vyjhrała, a potym prajhrała, i administracyjnaja sprava ab paklopie na mianie nakont sproby zabojstva, — hetuju spravu prajhraŭ jon. Ciapier baču, što kanca hetamu nia budzie doŭha, bo milicyja moža akazacca na jahonym baku, a čałavieku vielmi spadabałasia sudzicca», — prakamentavała sytuacyju Halina Łahackaja. Halina — hramadzkaja aktyvistka i časta biare ŭdzieł u roznych palityčnych mierapryjemstvach. «Ciapier jon budzie adsočvać mianie praź internet i pisać zajavy», — nie vyklučaje spadarynia Łahackaja.
Udałosia datelefanavacca i da spadara Valera Mileviča. Karespandent Svabody zapytaŭ u pensijanera, byłoha lotčyka Mileviča, ci nia jość jahonaja zajava ŭ milicyju pomstaj za kanflikt vakoł pakoju dla vazkoŭ na leśvičnaj placoŭcy.
«Nie liču, što z majho boku heta byŭ danos. U mianie jość pryčyny hetak rabić. Što da jaje, dyk jana nijakaja nie pradprymalnica, i kali vy miarkujecie, što jana zmahajecca za spraviadlivaść, dyk daremna. Jana krytykuje ŭładu, nazyvaje jaje bandyckaj, a ja liču, što ŭłada ŭ nas nie bandyckaja. Badaj što heta asnoŭnaje».
Karespandent: «Jana krytykuje ŭładu, vy jaje abaraniajecie, ale vaša susiedka nie zaklikaje pryciahnuć vas da adkaznaści za toje, to vy ŭładu padtrymlivajecie. Vy ž mienavita hetaha damahajeciesia adnosna jaje. Čamu? Chiba heta nie viartańnie da 37 hodu? I ŭvohule, vy ličycie narmalnym pisać takuju zajavu na žančynu?»
«Nie, ja liču, što heta nie 37-y hod i nie viartańnie da 37-ha hodu… Baču, u nas pajšła niekankretnaja razmova, tamu ja jaje spyniaju».
Pry hetym raniej u razmovie Valer Milevič zhadaŭ vykazvańnie svajho dzieda pra toje, što «kožnaja hałava — heta svoj rozum», i skazaŭ, što kropku ŭ spravie ab udziele Łahackaj u mitynhu pavinien pastavić sud.
Administracyjny praces nad Halinaj Łahackaj adbudziecca 9 krasavika. Valer Milevič skazaŭ, što jašče nia vyrašyŭ, ci pojdzie na praces.
Ciapier čytajuć
Siarhiej uziaŭ hrošy za kantrakt i pajšoŭ zdavacca ŭ pałon pry pieršaj mahčymaści. Pakručasty los biełarusa, jaki padpisaŭsia vajavać za Rasiju7
Kamientary